Nimeridhika na kazi inayofanyika kwenye Miradi ya Maji inayoendelea - DC-Mfune

Tarehe ya Kuanza: May 7th, 2021

Hayo yamesemwa na Mkuu wa Wilaya ya Mbarali Mhe. Reuben Mfune siku ya tarehe 05/05/2021 alipofanya ziara ya kutembelea miradi ya Maji ya Luduga-Mawindi utakaonufaisha vijiji vitano vya kata za Ipwani na Mawindi pamoja na Mradi wa Maji wa Ilongo uliopo kata ya Mahongole utakaovinufaisha vijiji 3.

Akiwa katika ziara hiyo ambayo aliambatana na Kamati ya Usalama pamoja na wataamu mbalimbali kutoka Ofisi ya RUWASA Mbarali Mhe. Mfune alifurahishwa na utekelezaji wa agizo la Naibu Waziri wa Maji Mhe. Eng. Maryprisca Mahundi alipotembelea Wilaya ya Mbarali.

“Kama mnavyojua Serikali ilileta fedha kwa ajili ya utekelezaji wa miradi ya maji, na Naibu waziri wa Maji alishatembelea na alitoa maelekezo. Nimefurahi utekelezaji hadi sasa ni mzuri  na nimeambiwa kuwa wiki hii wanafanya majaribio na wiki ijayo maji yataanza kutoka Kijiji cha Kangaga kilichopo kata ya mawindi.”

“Na kuhusiana na mradi wa Ilongo kwa sasa upo katika hatua nzuri kwani vitu vingi vya muhimu vimeshakamilika kilichobaki kwa sasa ni kusambaza miundombinu kutoka kwenye tank kwenda kwa wananchi na tunaendelea kuwasiliana na Wizara ili fedha zilizobaki ziweze kuletwa kumalizia mradi huu” alisema Mhe. Mfune

Meneja wa Maji RUWASA Wilaya ya Mbarali Eng. Samweli Heche alisema kuwa  mradi wa Maji Luduga-Mawindi hadi sasawamekamilisha uchimbaji wa mtaro na ulazaji wa bomba kuu umbali wa km 6, pamoja na bomba la usambazaji maji kijiji cha Kangaga umbali wa km 11.5, ujenzi wa tanki la maji la ujazo wa Lita 150,000, Ujenzi wa Tanki la kupunguza mgandamizo (BPT) pamoja na Ujenzi wa Vituo vya kuchotea maji 12.

Eng. Heche aliongeza kuwa kwa upande wa Mradi wa maji wa ilongo kazi zilizofanyika ni Uchimbaji wa mtaro na ulazaji wa bomba km 8, Ujenzi wa Tanki la kuhifadhia maji lenye ujazo wa lita 150,000 na Ujenzi wa Chumba cha Mitambo (Pumphouse), Ujenzi wa njia ya umeme mkubwa pamoja na ujenzi wa vituo vya kuchotea maji.

Mradi wa Maji Luduga-Mawindi unatarajia kuvinufaisha vijiji 5 vya kata za Mawindi na Ipwani ambavyo ni kijiji cha Kangaga, Mkandami, Ipwani, Matemela, Itipingi na Manienga na Mradi wa Maji Ilongo utavinufaisha vijiji 3 vya kata ya Mahongole ambavyo ni Ilaji na Igalako ambavyo vyote vipo kata ya Mahongole.

Mradi wa Maji wa Luduga-Mawindi hadi kukamilika kwake unatarajia kugharimu kiasi cha Tsh. Billion 9,666,262,149 kwa awamu 5 za ukamilishaji wake na hadi sasa mradi huo upo katika awamu ya 3. Mradi wa maji Ilongo unatarajia kughalimu kiasi cha shilingi million 846,788,006 hadi kukamilika kwake.

MWISHO