Tuzingatie Maelekezo Yanayotolewa na Serikali Dhidi ya Corona-Mtega

Tarehe ya Kuanza: May 1st, 2020

Hayo yamesemwa na Mwenyekiti wa Halmashauri ya Wilaya ya Mbarali Mhe. Francis Mtega alipokuwa akifungua kikao cha Baraza la Madiwani cha robo ya tatu ya mwaka 2019/2020 kilichofanyika tarehe 30/04/2020 katika ukumbi wa Shule ya Sekondari Rujewa kwa ajili ya kujadili shughuli mbalimbali za maendeleo  zinazoendela katika Halmashauri.

Mhe. Mtega amewataka Madiwani wote kuendelea kutoa maelekezo kwa wananchi ili wafuate  maelekezo yanayotolea na Serikali na pamoja na wataalamu wa afya namna ya kujikinga na ugonjwa  wa Corona unaoshambulia Dunia kwa sasa.

Sambamba na hilo Mhe. Mtega ameendelea kusisitiza suala la uwajibikaji wa kila mtu katika sehemu yake katika kusimamia sheria na taratibu zote zinazohusika kwa ajili ya mafanikio ya halmashauri ili wananchi waweze kufaidika.

Mkurugenzi Mtendaji wa Halmashuri ya Wilaya ya Mbarali Ndg. Kivuma Msangi amewaomba madiwani  kuendelea kutoa ushirikiano kwa wataalamu katika suala la ukusanyaji wa mapato wa halmashauri kwani hali inaonyesha kila mwaka mapato huwa yanaongezeka na hadi kufikia sasa mapato ya ndani yamefikia asilimia 81 na lengo kubwa kuvuka malengo waliyojiwekea

Aliongeza kuwa, madiwani ndio wenye wananchi, maagizo yanayotolea na serikali wawe wanawakumbusha watendaji waweze ili waweze kuyasimamia.

Msangi aliongeza kuwa, ugonjwa wa Corona hauchaugi kiongozi, kabila, siasa, chama wala dini, kwani umejikita kila mahali, kila mtu anapaswa kuchukua tahadharii.

Mkuu wa Wilaya ya Mbarali Mhe. Reuben Mfune ameagiza kuchukuliwa hatua kwa watu wote wanaorudisha nyuma zoezi la ukusanyaji wa mapato ya halmashauri, na kwa upande wa wazabuni wanaokusanya  mapato na bado hawajawasilisha fedha halmashauri waziwasirishe haraka, na kwa  wale wanaokaidi kulipa waondolewe kwa mujibu wa sheria.

“huu sio muda wa kubembelezana, wale waliokuwa wanahistoria ya kusumbua katika masuala ya ukusanyaji wa mapato, sioni haja ya kuendelea nao tena, tuna watu wengi wenye uwezo katika wilaya yetu”

Vilevile Mhe. Mfune amewapongeza madiwani kwa kuisimamia vizuri halmashauri bila kuleta migogoro, kitu kilichopelekea kupata hati safi.

Kuhusiana na taasisi ambazo zipo nje ya halmashauri, Mkuu wa Wilaya amewataka madiwani  kupita katika ofisi yake, ili waweze kupata majibu ya vitu wanavyovihitaji.

Katibu wa Chama Cha Mapinduzi Wilaya ya Mbarali ndg. Abdallah Mpokwa  amewapongeza Madiwani pamoja na uongozi wa halmashauri kwa kusimamia vizuri Ilani ya Chama Cha Mapinduzi  kwani kila kinachofanyika kinaonekana hasa shughuli za maendelo na suala la ukusanyaji wa mapato na amewataka madiwani kuendelea kutoa ushirikia kwa halmashauri ili waweze kufanya vizuri zaidi.