Baada ya Miezi 8 tutaanza kupata huduma kwenye Hospitali yetu Mpya ya Wilaya- Mfune

Tarehe ya Kuanza: January 24th, 2019

Mkuu wa Wilaya ya Mbarali, Mhe. Reuben Mfune ameujulisha umma wa wana Mbarali kuwa, Hospitali Mpya ya Wilaya ambayo ipo katika Kata ya Lugelele  ujenzi wake utaanza rasmi  kuanzia jumanne ya  tarehe 29/01/2019 na huduma itaanza kutolewa baada ya miezi 6 mpaka 8 kuanzia sasa.

Mhe. Mfune ameyasema hayo tarehe 24/01/2019 siku ya Uzinduzi wa upandaji miti Kiwilaya ambapo uzinduzi huo kiwilaya ulifanyika katika Kitongoji cha Mpunga Relini kilichopo kata ya Lugelele eneo ambalo hospitali Mpya ya Wilaya inajengwa.

“Katika kipindi hiki cha mvua tuendelea kuhamasisha wananchi kupanda miti, maeneo mengi yanayoendelea na ujenzi katika wilaya yetu hayana miti, ni lazima tuendelee kupanda miti kwenye maeneo yetu.”

“Tukiendelea kuotesha miti tuoteshe miti yenye faida zaidi moja kwa mfano mikorosho na miti ya matunda badala ya kuotesha mijohoro. Matokeo ya uoteshaji miti hii tutaanza kuyaona ndani ya miaka 5.”

Mhe. Mfune pia alisisitiza Halmashauri kujipanga vizuri kwa kushirikiana na wadau ili mwaka 2020 ipandwe miti 1,500,000 ambalo ndio lengo la Kitaifa kwa kila wilaya

Naye Afisa Misitu na Maliasili  wa Halmashauri ya Wilaya ya Mbarali Ndg. Charles Patrick Kwa niaba ya Mkurugenzi Mtendaji alisema kuwa, kwa mwaka uliopita 2018 Wilaya ya Mbarali ilifanikiwa kupanda miti takribani 560,000 katika maendeo mbalimbali ikiwemo kwenye vyanzo vya maji, kandokando ya misitu ya hifadhi ya vijiji, maeneo ya makazi, mashambani na kwenye maeneo ya malisho.

Aliongeza kuwa changamoto wanazokumbananazo katika zoezi la upandaji miti ni pamoja na mwamko mdogo kwa jamii juu ya suala la upandaji miti, uhaba wa mvua, uchomaji moto hovyo pamoja na uchungaji holela wa mifugo. 

kwa mwaka huu wilaya inampango wa kupanda miti takribani  750,000 katika maeneo mbalimbali zikiwemo taasisi za umma, binafsi makazi na kwenye vyanzo vya maji, na hadi kufikia sasa tayari kuna miti takribani 1,000 imeshapandwa kwenye maeneo mbalimbali.

MWISHO