DC AKABIDHI VIFAA VYA MICHEZO LIGI YA MPIRA IGURUSI

Tarehe ya Kuanza: July 24th, 2019

Mkuu wa Wilaya ya Mbarali Mhe. Reuben Mfune amekabidhi vifaa vya michezo kwa Mhe. Hawa Kihwele Diwani wa Kata ya Igurusi siku ya tarehe 23/07/2019 ikiwa ni ahadi aliyoitoa kama mgeni Rasmi kwenye mashindano ya KIHWELE CUP yaliyofanyika katika kata ya igurusi.

Akikabidhi vifaa hivyo vya michezo ambavyo ni Mipira miwili pamoja na nyavu mbili za magori, Mhe. Mfune aliwataka viongozi wa maeneo mengine kuiga mfano wa Diwani wa Kata ya Igurusi kwani amekuwa akiandaa mashindano hayo mara kwa mara.

“Ningependa Wilaya nzima kuwe na mashindano kama ilivyokuwa Kata ya Igurusi, Michezo inasaidia kuepukana na mambo mengi, michezo ni ajira, michezo ni afya na inawavutia vijana wengi.”

“Tuna timu yetu ya Ihefu ambayo ambayo inashiriki ligi daraja la kwanza na inahitaji wachezaji wengi hasa kutoka katika wilaya yetu ya Mbarali” alisema

Naye Mhe. Diwani wa Kata ya Igurusi Mhe. Hawa Kihwele amemshukuru Mkuu wa Wilaya kwa kuenzi michezo katika Wilaya ya Mbarali kwani michezo inatengeneza ajira, vilevile michezo ni afya kwani inawasaidia vijana kuepukana na maambukizi ya virusi vya ukimwi.

“Mipira pamoja na nyavu walizokuwa nazo wachezaji zilikuwa zimechakaa sana na Mkuu wa Wilaya  aliziona, tunamshukuru kwani aliahidi na ametekeleza.”

MWISHO