DC Akemea Visingizio Ujenzi wa Vyumba vya Madarasa, Zahanati

Tarehe ya Kuanza: October 29th, 2018

Mkuu wa Wilaya ya Mbarali Mhe. Reuben Mfune amekataa sababu au visingizio vinavyotolewa na viongozi wa kata pamoja na vijiji kuhusiana na zoezi la ujenzi wa vyumba vya madarasa pamoja na zahanati wilayani Mbarali.

Mhe. Mfune amekemea visingizio hivyo alipokuwa kwenye mwendelezo wa ziara zake katika kata za Lugelele na Mapogoro siku ya tarehe 29/10/2018 kwa ajili ya kufuatilia maagizo aliyoyatoa kwa viongozi wa kata na vijiji  kuhusiana na ujenzi wa vyumba vya madarasa, Ujenzi wa zahanati, ujenzi wa vyoo, masuala ya lishe pamoja na uandikishaji wa vyeti vya kuzaliwa kwa watoto wenye umri chini ya miaka 5.

Katika ziara hiyo Mhe. Mfune amekemea sababu zinazotolewa na viongozi hao kama, “tumepanga, tunamkakati, tutatekeleza pamoja na nyingine zinazofanana na hizo” kwani zinasababisha kazi za maendeleo kutofanyika kwa wakati, anachokitaka yeye ni kuona maagizo aliyoyatoa yanafanyiwa kazi kwa vitendo ili wananchi waweze kupata huduma wakiwemo wanafunzi wa kidato cha kwanza wanaotarajiwa kuanza masomo ifikapo Januari 2019.

“nikija awamu ya pili sitaki kusikia neno changamoto wala visingizio vya utekelezaji wa maagizo niliyoyatoa, changamoto ni zenu wenyewe mnaweza kuzitatua, wale ambao hawajaanza ujenzi wa vyumba vya madarasa pamoja na zahanati, nitakuja mwezi wa 11 mwishoni kukagua hatua za ujenzi zilipofikia”

Kuhusiana na masuala ya lishe pamoja na uandikishaji wa vyeti vya kuzaliwa kwa watoto wenye umri chini ya miaka mitano, Mkuu wa Wilaya ameendelea kusisitiza kuwa, elimu iendelee kutolewa kwenye mikutano ya hadhara inayoeleza umuhimu wa kuandikishwa watoto pamoja na masuala ya lishe kwani vitu hivi ni endelevu na elimu inatakiwa kuendelea kutolewa mara kwa mara.

“Tuendelee kuhamasisha sehemu zenye watoto wadogo wapate vyeti vya kuzaliwa kwani vina faida kwa maisha ya baadae, vyeti vya kuzaliwa vinatolewa bure kwa watoto wenye umri chini ya miaka 5”

Vilevile Mhe. Mfune ameendelea kuhamasisha watu kujenga vyoo bora na ifikapo tarehe 01/12/2018 hataki kusikia kuna kaya yeyote wilayani hapa haina choo kwani suala hilo halikubaliki popote.

“Pambaneni na wale ambao hawana vyoo wajenge kwa nguvu, kama una nyumba ya kuishi, unashindwaje kujenga choo!, tunachokihitaji ni kuepukana na magonjwa ya milipuko kama kipindupindu na kuhara”

Mwisho