DC ATOA SIKU 5 KUKAMILIKA UJENZI WA BANIO LA MTO MAMBI

Tarehe ya Kuanza: January 9th, 2019

Mkuu wa Wilaya ya Mbarali, Mhe. Reuben Mfune, ametoa siku tano kwa uongozi wa chama cha umwagiliaji cha wakulima Magurula kukamilisha ujenzi wa milango ya Banio la Skimu ya Umwagiliaji ya Magurula Luhanga (MALU) unaojengwa katika Mto Mambi uliopo Kata ya Utengule Usangu.

Ameyasema hayo alipokwenda kusikiliza malalamiko ya wananchi yaliyotolewa kwa uongozi wa skimu hiyo kuhusiana na ujenzi wa Banio siku ya tarehe 09/01/2019.

“Kufikia jumatatu ya tarehe 14/02/2019 mageti yote ya kugawa maji yawe yameshakamilika, nitatuma timu yangu kuja kukagua siku ya jumanne ya tarehe 15/01/2019 na baada ya matokeo ya geti nami nitakuja siku ya alhamisi ijayo kujionea hali halisi pamoja na kufanya maamuzi kama tunavunja au tutaendelea na hali hii.”

Naye Diwani wa Kata ya Utengule Usangu Mhe.Samora Msonsa amemshukuru Mkuu wa Wilaya kwa kuja kutatua mgogoro huo na maamuzi aliyoyafanya.

Banio la Skimu aya Umwagiliaji ya Magurula-Luhanga (MALU) inamilikiwa na na chama cha wakulima wa umwagiliaji Magurula. Skimu hii ina jumla ya Ekali 746 na inahudumia vijiji viwili, kijiji cha Magurula kilichopo kata ya Utengule Usangu na Kijiji cha Luhanga kilichopo ndani ya kata ya Luhanga.

Ujenzi wa Banio la Skimu ya Umwagiliaji ya Magurula-Luhanga (MALU), ulianza ujenzi tarehe 15/12/2018 na unatarajia kukamilika tarehe 15/01/2019 kwa gharama ya tsh milioni 7.7 ambapo gharama za ujenzi ni milioni 6.8 na gharalama za usajili ni laki 9 ambapo fedha hizo zinatolewa na wakulima wenyewe.

Ujenzi wa Banio unasimamiwa na Mhandisi wa Umwagiliaji Wilaya ya Mbarali chini ya idara ya Kilimo, Umwagiliaji na Ushirika kwa niaba ya Mkurugenzi Mtendaji wa Halmashauri ya Wilaya ya Mbarali.

MWISHO