DC Awakemea Wanaosuasua Kuanza Ujenzi wa Zahanati

Tarehe ya Kuanza: October 31st, 2018

Mkuu wa Wilaya ya Mbarali Mhe. Reuben Mfune, amevitaka vijiji vyote ambavyo havijaanza ujenzi wa Zahanati katika Wilaya ya Mbarali kuanza mara moja ndani ya mwezi wa 11.

Mhe. Mfune ameyasema hayo alipokuwa kwenye mwendelezo wa ziara zake katika kata za Mawindi na Ipwani zilizopo tarafa ya Rujewa siku ya tarehe 30/10/2018 kwa ajili ya kufuatilia maagizo aliyoyatoa kwa viongozi wa kata na vijiji  kuhusiana na ujenzi wa vyumba vya madarasa, Ujenzi wa zahanati, ujenzi wa vyoo, masuala ya lishe pamoja na uandikishaji wa vyeti vya kuzaliwa kwa watoto wenye umri chini ya miaka 5.

“Nataka ndani ya mwezi wa 11, zahanati zote wilayani mbarali ambazo hazijaanza kujengwa, ziwe zimeanza kujengwa”

Katika hatua nyingine Mkuu wa Wilaya amewapongeza viongozi wote wa kata ya Ipwani wakiongozwa na Diwani wa Kata hiyo Mhe. Marcusi Kalinga kwa hatua nzuri waliyofikia katika kukamilisha ujenzi wa shule ya sekondari Ipwani kwani kukamilika kwake kutasaidia  upatikanani wa elimu kwa wanafunzi wa kata ya Ipwani.

“Nimevutiwa na hatua ya Ujenzi mliyofikia, hadi sasa kuna mabadiliko makubwa tangu nilivyofika awamu iliyopita mwezi julai, wananchi wamejitahidi sana nipo tayari tuitishe harambee ili kumalizia vitu vilivyobaki, kwani kukamilika kwa shule hii kutapunguza mzigo katika shule jirani ya Mawindi”

Vilevile Mhe. Mfune ameendelea kuwasititiza wananchi wote kujenga vyoo bora ili ifikapo tarehe 01/12/2018 suala la kutokuwa na vyoo liwe historia katika wilaya ya Mbarali na amewaagiza viongozi wote kuanzia ngazi ya kata hadi vijiji kuwafikisha kwenye mabaraza ya kata wale wate ambao hawana vyoo mpaka sasa.

“Kuna baadhi ya watu wanajua kula tu, ila kujenga vyoo hadi tulazimishane, majadilianao ya kujenga vyoo yafikie mwisho, tunataka kufikiria kujenga zahanati, vyumba vya madarasa pamoja na mambo mengine ya maendeleo, vilevile adhabu itolewe kwa wale waliojenga  vyoo ila hawavitumii”

“Niwapongeze Kata ya Ipwani kwa kufanyia kazi suala la kutokuwa na vyoo, sasa tuhame kutoka kwenye vyoo vya asili kwenda kwenye vyoo bora, choo bora ni choo kilichojengwa kwa tofari, kinachosafishika, kilichoezekwa na kuwa na mlango, hatufanyi haya ili kujifurahisha ila ni kuepukana na magonjwa ya mlipuko”

Kuhusiana na Masuala ya lishe na uandikishaji wa watoto wenye umri chini ya miaka mitano na kupata vyeti vya kuzaliwa, Mhe. Mfune alisema kwamba mambo haya ni endelevu, yanahitaji kutolewa elimu kila mara, viongozi wa vijiji na kata wanatakiwa kutoa japo dakika 10 kwa waelimishiji kwenye kila mikutano hadhara ili elimu hii ziweze kutolewa.

“Vyeti vya kuzaliwa vina faida nyingi sana, sasa hivi mtoto ni lazima awe na cheti cha kuzaliwa, vyeti hivi chini ya miaka 5 vinatolewa bure, baada ya hapo watatakiwa kuvilipia, tuendelee kuhamasisha ili kila mtoto aweze kuandikishwa.”

“Mtoto akikua na hali ya udumavu kila kitu kinavia, sababu ubongo unakuwa haujakua vizuri, tuendelee kuelimisha wananchi madhara na faida zake na ifike mahali ambapo mtu ambaye hampeleki mtoto wake kupimwa utambuzi wa hali ya lishe (ukondefu, uzito pungufu na udumavu) apigwe faini na faini hizo zitumike kusidia kuwajengea vyoo wale ambao hawajiwezi.”

MWISHO