DC Mbarali Awataka Wajasiliamali Wadogowadogo Kutembea Kifua Mbele.

Tarehe ya Kuanza: January 2nd, 2019

Mkuu wa Wilaya ya Mbarali Mhe. Reuben Mfune, amewataka wajasiliamali wote wadogowadogo ambao watapatiwa vitambulisho vya utambuzi vilivyotolewa na Rais wa Jamhuri ya Muungano wa Tanzania Mhe. Dr John Pombe Magufuli Kutembea kifua mbele bila ya kuwa na hofu yoyote watakapokuwa wanafanya biashara zao.

Ameyasema hayo alipokuwa kwenye uzinduzi wa vitambulisho hivyo  siku ya jumanne ya tarehe 02/01/2019 alipokuwa akizindua pamoja na kugawa vitambulisho kwa wajasiliamali (wafanyabiashara) wadogoadogo katika ukumbi wa polisi ulipo Kata ya Rujewa wilayani Mbarali.

Akizindua ugawaji wa vitambulisho hivyo, Mhe. Mfune amempongeza Rais wa Jamhuri ya Muungano wa Tanzania Mhe. Dr John Pombe Magufuli kwa kuwajali wajasiliamali wadogowadogo ambao mauzo ghafi yao hayazidi kiasi cha shilingi milioni 4 kwa mwaka kwa kuona kuwa wana haki ya kufanya shughuli zao bila ya kusumbuliwa.

“Ukishajaza fomu na kuchukua kitambulisho wakati hauna sifa, mkono wa sheria utakukuta, kitambulisho hiki sio kinga ya kuvunja sheria zingine zilizopo, tufanye kazi kwa kufuata sheria, kitambulisho hiki ni kwa ajili ya utambuzi, hatutegemei baada ya miaka 3 utabaki kama ulivyo, fanya kazi kwa bidii timiza malengo, kesho ukue ifike kipindi uwe unalipa kodi kwa ajili ya maendeleo.”

“Tutaweka utaratibu mzuri kwa mujibu wa ratiba ili viweze kutolewa kwenye maeneo yetu tunayoishi, leo tunafanya uzinduzi, sio siku ya mwisho, zoezi hili ni endelevu na siku ya mwisho kugawa tutawajulisha. kitambulisho hiki ni kwa ajili ya kuto lipa kodi za sekta rasmi kama TRA, Leseni na nyinginezo” alisema Mhe. Mfune

Akizungumza katika kikao hicho, Mwenyekiti wa Chama Cha Mapinduzi Wilaya ya Mbarali Ndg. Hashimu Mwalihawa alisema kuwa, lengo la Mhe. Rais ni kuwasaidia wanyonge ambao ni wafanyabiashara wadogowadogo, kila mtu kwa nafasi yake amsaidie Mhe. Rais kama ni kweli wale watakaochukua vitambulisho wamefuata vigezo vilivyowekwa.

Naye Mkurugenzi wa Halmashauri ya Wilaya ya Mbarali Ndg. Kivuma H. Msangi alisema kuwa, yeye na timu yake wamejipanga kuhakikisha kunakuwa na kituo katika kila kijiji ili wajasiliamali wasisumbuke kuvitafuta, na wale wote waliohudhuria uzinduzi watapatiwa vitambulisho vyao leo kama watakuwa wamekidhi vigezo.

Sifa za kupewa vitambulisho vya wafanyabiashara wadogowadogo ni pamoja na, mauzo Ghafi yao yasizidi kiasi cha shilingi milioni 4 kwa mwaka yaani shilingi elfu 12 kwa siku, uwe haujasajiliwa na TRA yaani kupata namba ya mlipa kodi (TIN NAMBA), Vitambulisho hivyo vitatolewa kwa kulipia kiasi cha shilingi elfu 20 mara baada ya kujaza fomu maalumu ambayo itakuhitaji kuwa mkweli na ukigundulika umefanya undanganyifu ili kujipatia kitambulisho, utachukuliwa hatua kali za kisheria sambamba na kunyang’anywa kitambulisho hicho.

Jumla ya vitambulisho 46 vimetolewa kwenye zoezi la uzinduzi kwa wafanyabiashara wadogo wadogo ambao wamekidhi vigezo. Vitambulisho vingine vitaendelea kutolewa katika ofisi za kata na vijiji kwa utaratibu utakaopangwa

MWISHO