DED Mbarali awataka Tume ya Utumishi wa Walimu kuzingatia Sheria na Miongozo wanapofanya maamuzi.

Tarehe ya Kuanza: July 13th, 2020

Mkurugenzi Mtendaji wa Halmashauri ya Wilaya ya Mbarali Ndg. Kivuma H. Msangi amewataka wajumbe wa Tume ya Utumishi wa Walimu ngazi ya Wilaya (TSC) kushughulikia masuala ya kinizamu ya walimu kwa kufuata sheria zilizopo ili waweze kutenda haki kulingana na makosa yaliyofanywa.

Ameyasema hayo siku ya tarehe 13/07/2020 kwenye ukumbi wa Ofisi ya Mkuu wa Wilaya ya Mbarali ulipo Kata ya Lugelele alipokwenda kusimamia zoezi la kuwaapisha wajumbe wapya wa kamati   hiyo walioteuliwa kushughulikia masuala ya ajira na nidhamu, rufaa ngazi ya Wilaya pamoja na masuala ya maendeleo kwa watumishi wa shule za msingi na sekondari walio katika Utumishi wa Serikali.

“Ni jambo la heshima sana kupewa nafasi ya uteuzi kwa ngazi yeyote ile kwenda kuwatumikia watu. Mnakwenda kushughulikia maslahi na maisha ya watu, jambo hili linahitaji umakini sana, kikubwa kinachohitajika ni uadilifu katika kufanya uchunguzi pamoja na maamuzi kwa kufuata Miongozo, waraka na sheria bila ya kumuonea yeyote.”

“Wakuu wa shule za sekondari na msingi mnatakiwa kufanya ufuatiliaji wa walimu walio chini yenu kabla ya kuniletea ili nipeleke kwenye Tume kwa ajili ya kufanyiwa uchunguzi na maamuzi.”

Katika hotuba yake Msangi aliongeza kuwa mwaka 2019 Wilaya ya Mbarali imepata usajili wa shule 2 za sekondari, mwaka huu 2020 wamepata usajili wa shule 6 za sekondari pamoja na za kidato cha tano na sita mbili, pamoja na usajili wa shule 4 za msingi na wanatarajia kupata usajili wa shule za sekondari 3 ifikapo mwaka 2021.

Akizungumza kwa niaba ya wenzake walioapishwa Mwenyekiti ya Kamati Mpya ya Tume ya Utumishi wa Walimu Mwl. Stella Mbinda ameushukuru uongozi wa TSC Taifa kwa nafasi ya pekee waliyoapa na ameahidi kwenda kufanya kazi kwa kuzingatia weledi, kufuata maadili na umakini mkubwa bila ya kumuonea yeyote.

Naye Katibu wa Tume ya Utumishi wa Walimu Wilaya ya Mbarali Mwl. Issa Shemgei alisema kuwa kwa mwaka 2016 hadi 2020 wamepokea masuala ya kinidhamu 37, kati ya mashauri hayo walimu 24 wamefukuzwa kazi, 7 wamepewa karipio, 1 amepewa onyo, 1 ameshushwa cheo na 4 wanasubili uchunguzi na maamuzi ya kamati.

Mwl. Shemgei aliongeza kuwa, kati ya mwaka 2016 hadi 2020 jumla ya walimu 99 wameajiliwa na katika kipindi hicho walimu 377 wamepandishwa vyeo na walimu 76 wamebadilishiwa vyeo vya kimuundo baada ya kujiendeleza kielimu kwa ngazi mbalimbali.

Wajumbe wa Tume ya Utumishi wa Walimu Wilaya ya Mbarali ni pamoja na Mwl. Stella Mbinda (Mwenyekiti), Mwl. Issa Hemgei (Katibu), Mwl. John Luena (Mjumbe), Mwl. Grolia Spotwa (Mjumbe),  Mkuu wa Idara ya Elimu Sekondari Mwl. Anna Shitindi (Mjumbe) pamoja na Katibu Tawala Wilaya ya Mbarali Ndg. Michael Semindu (Mjumbe).

MWISHO