Hospitali Mpya ya Wilaya Kukamilika ifikapo Septemba 2019- Msangi

Tarehe ya Kuanza: April 2nd, 2019

Hayo yamesemwa na Mkurugenzi Mtendaji wa Halmashauri ya Wilaya ya Mbarali Ndg. Kivuma Msangi alipofanya ziara akiwa na Timu ya Wataalamu ya Halmashauri (CMT) kwa ajili ya kukagua ujenzi wa Hospitali Mpya ya Wilaya siku ya tarehe 02/04/2019 katika kata ya Lugelele, kitongoji cha Mpunga Mmoja sehemu inapojengwa Hospitali hiyo.

Msangi alisema kwamba Hospitali Mpya ya Wilaya inatarajiwa kukamilika ifikapo Mwezi wa Tisa mwaka huu 2019, na kukamilika kwa hospitali hii kutaongeza upatikanaji wa huduma za afya za kisasa na katika mazingira bora sambamba na hayo pia  itakuza uchumi wa mwananchi mmoja mmoja kwani kutapanua fursa nyingi za ajira, biashara wakiwemo mama lishe, bodaboda, bajaji, nyumba za kulala wageni, nyumba za kupangingisha na nyinginezo nyingi.

Akisoma taarifa ya ujenzi wa Hospitali hiyo Mkuu wa Idara ya Ujenzi wa Halmashauri ya Wilaya ya Mbarali  Eng. Abbas Kitalima alisema kuwa, katika awamu hii ya kwanza wamepokea  jumla ya shilingi Bilion moja na Milioni mia tano (1,500,000,000/=) ambayo itakamilisha ujenzi wa majengo saba mapya sambamba na umaliziwaji wa jengo la ghorofa moja ambalo litatumika kwa shughuli za utawala pamoja na kutoa huduma kwa wagonjwa wa nje (OPD) hivyo kufanya jumla ya majengo tisa.

Eng. Kitalima aliongeza kuwa kwa sasa ujenzi wa majengo hayo yote yapo katika hatua mbalimbali za ujenzi na yanatarajiwa kukamilika ifikapo Septemba 2019.

Timu ya Wataalamu iliweza kutembelea na kukagua ujenzi wa majengo yote  yanayoendelea kujengwa na imeridhishwa na hatua iliyofikia hadi sasa. wamemtaka Mkuu wa Idara ya Ujenzi pamoja na Kamati mbalimbali zilizoundwa kwa ajili ya usimamizi kuongeza kasi ya usimamizi ili wananchi waanze kupata huduma na kuhakikisha ubora wa majengo unazingatiwa.

Majengo mapya yanayojengwa mpaka sasa ni pamoja na Wodi Wazazi (Maternity Word), Jengo la Maabara, Jengo la Mashine za Mionzi (X-Ray), Jengo la Dawa za Chanjo, Jengo la Kufulia Nguo, Jengo la Ghala la Madawa, Jengo la Mifumo ya Umeme (Power House) pamoja na ukarabati wa jengo la ghorofa moja ambalo litatumika kwa ajili ya wagonjwa wa nje pamoja na shughuli za utawala.

MWISHO.