Iwe mwisho!msizoee tabia hii maana mbunge leo anatoa ipo siku hatotoa- Makamu wa Rais

Tarehe ya Kuanza: July 31st, 2018

MAKAMU wa Rais wa Jamhuri ya Muungano wa Tanzania Mhe. Samia Suluhu Hassan amewataka wakazi wilayani Mbarali mkoani Mbeya kuacha tabia ya utegemezi ya kuchukua mikopo na kutolipa wakisubiri neema ya kusamehewa au kulipiwa na watu wengine.

Mhe. Suluhu aliyasema hayo alipofanya ziara ya kikazi katika Wilaya ya Mbarali Mkoani Mbeya katika mkutano wa hadhara uliofanyika kijiji cha Kapunga kata ya Itamboleo baada ya mbunge wa jimbo hilo Phil Mohamed kutangaza uamuzi wa kujitwisha mzigo wa kulipa deni la shilingi milioni 800 wanazodaiwa baadhi wakulima 334 wakazi wa Wilaya ya Mbarali walipokopa Powertiller benki.

Mbunge wa Jimbo la Mbarali Mhe Haroon Pilmohamed alisema wakulima hao walishindwa kulipa deni hilo ambalo awali Serikali za vijiji ndizo ziliwadhamini na sasa kumekuwa ne kero ya kuwadai na kusababisha baadhi yao kukimbia nyumba zao.

Kufuatia hali hiyo, Makamu wa Rais alimpongeza Mbunge huyo kwa moyo wa kujitolea lakini akaonya iwe mara ya mwisho kwa wananchi kukopa na kusubiri mserereko wa kulipiwa.

“Iwe mwisho!msizoee tabia hii maana mbunge leo anatoa ipo siku hatotoa au ataondoka aje asiyetoa nani atakaye walipia.Acheni utegemez.Mbona Mungu anawaajalaaia kipato mnalima mpunga mnapata kwa nini msilipe.Mnayo miradi mingine pia inawapa vipato.”

“Nawasihi wana kapunga na wana Mbarali mtambue kuwa hii pia mnamchukiza hata Mungu anayewajaalia mnapata mazao mengi.Jifunzeni kujisimamia maana mkiendelea kusubiri kulipiwa itakuja mikopo mingine watu wataogopa kuileta huku kwenu” alisisitiza.

Wakati huo huo makamu wa Rais aliwataka wakazi wilayani Mbarali kutojipendelea wao pekee katika matumizi ya maji ya vyanzo vya mto Ruaha badala yake watambue kuwa zipo pande tatu muhimu zinazotegemea maji hayo.

Alizitaja pande hizo tatu kuwa ni wao wenyewe wakulima, wanyama na ikolojia yote ya hifadhi ya Ruaha na pia uzalishaji wa umeme katika bwawa la Mtera.

“Kabla sijaja na kampeni yangu inayolalamikiwa tulipita kule hifadhini na kujionea wanyama wanavyopata shida.Tembo ndiyo analazimika kuchimba ardhini ili apate maji ya kunywa.Wanyama wengine wadogo wadogo wanalazimika kupanga foleni wakimsubiri achimbe, anywe atosheke akiondoka ndipo na wao wapate nafasi ya kunywa.Lakini baada ya kufukua mifereji na mito mliyokuwa mmeelekeza kwenye mashamba yenu maji yamerudi kule.”

“Tutambue kuwa wanyama hawaongei, kuwa na wao siku moja wataweka mkutano wa hadhara waseme tuleteeni maji. Ni lazima tuwaonee huruma hivyo tusibaki kusema maji yawe kwa kilimo chetu tu.Tukumbuke pia kwa kukosa maji namna tulivyopata shida ya umeme miaka kadhaa iliyopita.Sasa sisi tunasema Tanzania ya uchumi wa viwanda tutawezaje kama tutakosa umeme kwa kuruhusu maji yote yatumike kwa kilimo pekee” alisema.