Jukumu la Kupambana na Corona Sio la DC na Mkurugenzi Pekee, Ni la Kila Mtu-Mfune

Tarehe ya Kuanza: April 28th, 2020

Hayo yamesemwa na Mkuu wa Wilaya ya Mbarali Mhe. Reuben Mfune alipoitisha kikao kati yake na baadhi ya viongozi wa Serikali wakiwamo Kamati ya Usalama ya Wilaya na Watendaji wa Kata siku ya tarehe 27/04/2020 ofisini kwake kwa ajili ya kujadili taarifa ya kamati ya Ufuatiliaji iliyoundwa na Kamati ya Usalama Wilaya kwa ajili ya mapambano ya kujikinga dhidi ya ugonjwa wa COVID 19.

Mhe Mfune alisema kwamba, kamati iliundwa kwa ajili ya kufuatilia maelekezo yanayotolewa na Viongozi Wakuu wa Nchi, Wizara Mkoa na Wilaya imefanya ufuatiliaji kwenye kata saba na kubaini kuwa kuna baadhi ya Viongozi na Watendaji wa Serikali hawatekelezi vizuri majukumu yao dhidi ya janga la Corona

 “Baadhi ya watendaji wa Serikali, Watendaji wa Kata, Watendaji wa Vijiji, wenyeviti wa vijiji, wenyeviti wa Vitongoji pamoja na Serikali zao hawawajibiki vizuri kutoa maelekezo yanayotolewa na Serikali  dhidi ya  kujikinga na ugonjwa hatari wa Corona.”

 “Viongozi wote wa Serikali walio chini yangu muendelee kutoa elimu kwa njia mbalimbali kama vipeperusi, kupita kwenye nyumba za ibada, Masoko, minada, magurio, sehemu za starehe kama Bar, Pub na vilabu vya pombe za kienyeji ili kusimamia maagizo niliyoyatoa ya namna ya kujikinga na ugonjwa wa Corona.”

 “Vilevile ni marufuku kwa watendaji wote wa kata na vijiji kutoka kwenye vituo vya kazi bila kupata idhini kutoka kwa Mkurugenzi Mtendaji wa Halmashauri.”

 Mkuu wa Wilaya ameagiza kufungwa kwa Guest bubu zote zilizopo wilayani hapa na ameagiza kufanyika kwa ukaguzi wa mara kwa mara kwa guest zingine zinazofanya kazi ili kuangalia usahihi wa kumbukumbu zilizopo kwa wageni wa ndani na nje.

Vilevile Mhe. Mfune amepiga marufuku mikusanyiko isiyo ya lazima kama michezo ya Bao, Draft, pool table pamoja na michezo mingine inayokusanya watu wengi. Kuhusiana na misiba ameagiza ihudhuriwe na watu wachache na kwa muda mfupi.  Chakula kiandaliwe kwa watu wa karibu tu pamoja na wana familia na isiwe kwa kila mtu atakaehudhuria.

Vilevile amewataka wahudumu wote kwenye maeneo ya starehe pamoja na madereva wa vyombo vya moto kuvaa Barakoa wakati wa kutoa huduma kwa wateja wao, na Wananchi wote wanatakiwa kuvaa Barakoa wanapokwenda kwenye maeneo yenye misongamano au wanapopanda vyombo vya moto.

Mhe Mfune amewataka Mafundi wanaotengeneza Barakoa za Vitambaa waendelee kutengeneza Barakoa kwa kutumia Vitambaa vya Cotton na Barakoa hizo ziwe na matabaka kuanzia matatu na ziuzwe kwa bei nafuu.

MWISHO