KAMATI YA SIASA MKOA YAWASILI MBARALI KWA AJILI YA GN 28

Tarehe ya Kuanza: November 15th, 2018

Kamati ya Siasa ya Chama Cha Mapinduzi (CCM) Mkoa wa Mbeya imefanya ziara Wilaya ya Mbarali kuanzia Novemba 13 hadi 14, 2018 ikiongozwa na Mwenyekiti wa CCM Mkoa wa Mbeya Ndg. Jacob Mwakasole kwa ajili ya Kujifunza na kujiridhisha mambo ambayo yanalalamikiwa na wananchi kuhusiana na tangazo la Serikali namba 28 la mwaka 2008 (GN. 28 ya 2008.) pamoja na kujionea uharibifu wa mazingira katika vyanzo vya maji.

Katika ziara hiyo, Ndg. Mwakasole aliongozana na Mkuu wa Mkoa wa Mbeya Mhe. Albert Chalamila na kupokelewa na Kamati ya Siasa Wilaya na Mbarali, Mkuu wa Wilaya ya Mbarali Mhe. Reuben Mfune, Mbunge wa Jimbo la Mbarali Mhe. Haroon Pirmohamed pamoja na viongozi mbalimbali wa Serikali.

Ndg. Mwakasole amesikitishwa na uharibifu wa vyanzo vya maji unaoendelea katika maeneo mbalimbali na ameitaka Serikali kuendelea kutoa elimu kwa wananchi ili wasiendelee kulima mashamba ndani ya mita 60 kutoka kwenye vyanzo vya maji kwani ni kinyume cha sheria.

Kuhusiana na mgogoro wa mpaka kati ya  Hifadhi ya Taifa ya Ruaha (RUNAPA) na vijiji vya Wilaya ya Mbarali Ndg. Mwakasole amewasihi wakazi wote wa Mbarali ambao maeneo yao yapo kwenye GN 28 ya 2008 (tangazo la serikali namba 28 la mwaka 2008) kuto fanya maendeleo ya kudumu hadi pale muafaka utakapopatikana.

Vilevile Ndg. Mwakasole aliwaahidi wananchi kulishughulikia tatizo hilo haraka.

Maeneo yaliyotembelewa na kamati ya Siasa ni pamoja na eneo chepechepe la Ihefu lililopo ndani ya hifadhi ya Taifa ya Ruaha, Banio  la maji lililopo eneo la  kijiji cha Warumba pamoja na mashamba ya Mpunga ya Mnazi katika kijiji cha Mwanavala Kata ya Imalilo Songwe.

=MWISHO=