KAMATI YA USALAMA MBARALI YAWAPONGEZA WACHIMBAJI WA MADINI.

Tarehe ya Kuanza: November 10th, 2020

Kamati ya Usalama Wilaya ya Mbarali ikiongozwa na Mkurugenzi Mtendaji wa Halmashauri ya Wilaya ya Mbarali Ndg. Kivuma Msangi imetembelea wachimbaji wa madini wanaopatikana wilaya ya Mbarali na kufurahishwa na jitihada wanazozifanya katika machimbo hayo.

Kamati hiyo imefanya ziara siku ya tarehe 10/11/2020 katika vijiji vya Msesule, Mayota na Lugelele ikiwa na lengo la kuangalia na kujiridhisha hali ya usalama wa wananchi wanaofanya kazi katika machimbo hayo, hali ya kimazingira, migogoro iliyopo kwenye maeneo hayo pamoja na upatikanaji wa kodi ya Serikali na ushuru wa Halmashauri.

Ndg. Msangi amewataka wachimabi hao kufuata taratibu zote zilizowekwa na Serikali ikiweo kulipa Kodi na Ushuru wa Halmashuri, kuhuisha lesini zao mara zitakapoisha muda wa matumizi, kununua vitendea kazi vya kisasa pamoja na kuweka mazingira mazuri kwa watumishi wao wa migodini.

“Kupatikana kwa madini Wilaya ya Mbarali ni fursa kwa Serikali na wananchi wake, Serikali itafaidika kwa kupata Kodi pamoja na ushuru, na wananchi wetu watapata ajira, nawasihi wananchi wa Mbarali tujitokeze kwenye hii fursa tuliyoipata ili tujiongezee vipato vyetu.” Alisema Msangi.

Naye Afisa Madini Mkazi Ofisi ya Mbeya Ndg. Godson Kamihanda alisema kuwa kwa sasa wanaendelea kutoa vibali kwa wachimbaji wadogo, wa kati na wakubwa na hadi sasa kwa Wilaya ya Mbarali wameshetoa leseni 55.

Kuhusiana na ushuru wa Halmashauri bwana Kamihanda alisema kuwa Ofisi yake ipo tayari kutoa ushirikiano ili mapato ya Serikali yasipotee.Mjiolojia Ofisi ya Madini Mbeya Ndg. Ezekiel Seni aliongezea kuwa kwa Wilaya ya Mbarali watu wengi wameomba leseni za uchimbaji wa Dhahabu na ili mwenye leseni aweze kuanza uchimbaji anatakiwa kupata ridhaa au makubaliano na mmiliki wa Ardhi, na kama hawata afikiana kibali cha leseni kilichotolewa kinafutwa.

Nao wachimbaji wa madini Wilaya ya Mbarali ndg. Christopher Uhagile kutoka mgodi wa Vat Leaching na Ndg Hawa Zuberi Mgobasa (Makweta) kwa niaba ya wenzao wameishukuru kamati ya Usalama Wilaya ya Mbarali kwa kuwatembelea pamoja na kutambua uwepo wao katika maeneo hayo na wameahidi kutoa ushirikiano kwa Serikali.

MWISHO