Kaya 10,593 Zanufaika na Mpango wa Tasaf Awamu Tatu Mbarali

Tarehe ya Kuanza: December 13th, 2017

Jumla ya tsh milion 321,772,000 zimelipwa kwa kaya 10,593 zinazonufaika na Mpango wa Kunusuru Kaya Masikini (TASAF III) kati ya tsh. Milioni 324,068,000/= zilizotengwa kwa ajili ya kulipa kaya 10,674 zilizopo katika vijiji vyote 75 vilivyopo kwenye mpango huo wilayani Mbarali mkoani Mbeya katika Msimu huu wa Novemba –Desemba mwaka 2017

Hayo yamebainishwa na Mratibu wa Tasaf Wilaya ya Mbarali Ndg Zabron Abel alipokuwa akielezea namna mpango huo ulivyokuwa na manufaa makubwa kwa jamii hususani baada ya walengwa kutambua Dhima ya Serikali ya kuziwezesha kaya masikini na kuachana na matumizi yasiyo sahihi.

Zabron Alisema kuwa Elimu ya ujasiriamali na ya kujiunga katika vikundi ambayo imekuwa ikitolewa kwa wanufaika, imewezesha kwa kiasi kikubwa fedha zinazotolewa kuelekezwa kwenye miradi ya ujasiriamali badala ya matumizi mengine.

Aliongeza ya kuwa hadi sasa wilayani hapa kuna zaidi ya vikundi 156 vipo kwenye mchakato wa kusajiliwa na kila kimoja kina wanachama wasiopungua 20 kati yao wakiwemo wanufaika wa Tasaf III.

Kwa upande wao wanufaika wa mpango huo katika kijiji cha Lyambogo kata ya Chimala wilayani hapa, Ally Mwinjuma, Fatuma Said, Atutangile Ngoloka na Waziri Mohamed walisema Tasaf III imewapa unafuu mkubwa katika maisha yao. Kwani kupitia Mpango huo wanaamini  Misitu ya asili itaweza kutunzwa kwakuwa awali walilazimika kuivamia na kukata miti kwa ajili ya kuni za kuuza ili kujipatia kipato.

Naye Mwenyekiti wa kijiji cha Lyambogo, Isambi Mwashibanda alibainisha kuwa kwa sasa kijijini hapo kuna mabadiliko ya kimaisha kwa kaya zinazonufaika na Mpango kwani hata waliokuwa hawajawahi kufuga sasa walau unaweza kukuta wana miliki kuku, mbuzi au nguruwe.