Kuanzia Tarehe 01/12/2018 Sitaki Kusikia Kuna Kaya Haina Choo Bora- DC Mbarali

Tarehe ya Kuanza: October 27th, 2018

Hayo yamesemwa na Mkuu wa Wilaya ya Mbarali Mhe. Reuben Mfune katika mwendelezo wa ziara zake katika kata za Mwatenga, Mahongole, Ruiwa pamoja na Igurusi siku ya tarehe 26/10/2018 katika kufuatilia maagizo aliyoyatoa katika kikao cha tarehe 07/09/2018 kwenye kikao alichokiitisha na watendaji wa vijiji, watendaji wa kata pamoja na wenyeviti wa vijiji.

“Ifike muda wale wote wasio na vyoo wafikishwe kwenye vyombo vya sheria, Wilaya ya Mbarali ni ya pili kutoka mwisho kwa Mkoa wa Mbeya  katika suala la vyoo, wakati tuna uchumi mkubwa wa kilimo, ni aibu”

Mhe. Mfune amewataka wale wote wanaondelea na ujenzi wa vyoo kujenga vyoo bora vyenye gharama nafuu ambapo mfuko mmoja wa saruji (Cement) wa kilo 50 unaweza kusakafia vyoo vya kaya 5 vyenye hadhi ya kuitwa vyoo bora.

Kuhusiana na ujenzi wa vyumba vya madarasa pamoja na ujenzi wa zahanati kwa kila kijiji Mkuu wa Wilaya ameupongeza uongozi wa kata ya Mahongole kwa kukamilisha ujenzi wa vyumba vyote vinavyohitajika kwa kidato cha kwanza na amevitaka vijiji vyote vilivyopo Wilaya ya Mbarali kukamilisha kwanza ujenzi wa zahanati, na mara baada ya kumaliza ujenzi huo waunganishe nguvu kujenga vituo vya afya.

“Zoezi la ujezi wa vyumba vya madarasa liende sambamba na utengenezaji wa madawati, nikija mwezi wa 11 sita kuwa na kikao cha ndani, tutakutana kwenye miradi muwaelekeze wananchi kufanya shughuli za maendeleo, kila mtendaji ajitahidi kufanya katika eneo lake”

Kuhusiana na suala la lishe pamoja na uandikishaji wa yeti vya kuzaliwa, alisema kuwa, mazoezi haya ni endelevu sababu watoto wanazaliwa kila siku utengwe muda wa dakika 10 kwenye kila mikutano ya hadhara kutoa elimu ya masuala ya lishe na uandikishwaji wa vyeti vya kuzaliwa kwa watoto kwani vinatolewa bure kwa wenye umri chini ya miaka 5 na kwa kipindi hiki huwezi kupata kitambulisho cha Taifa kama bila ya kuwa na cheti cha kuzaliwa.

Mhe. Mfune aliagiza watendaji wote pamoja na wenyeviti kuongeza juhudi katika kusimamia ujenzi wa zahanati kwa kila kijiji, ujenzi wa vyumba vya madarasa, masuala ya lishe kwa watoto, uandikishaji wa vyeti vya kuzaliwa kwa watoto wenye umri wa chini ya miaka mitano pamoja na ujenzi wa vyoo bora kwa kila kaya.

MWISHO