“Kuna Utaratibu wa Kufuata Kuwaondoa Viongozi wa Vijiji”

Tarehe ya Kuanza: November 18th, 2017

Hayo yamesemwa  na Mkuu wa Wilaya ya Mbarali Mhe Reuben Mfune kwenye mkutano wa hadhara aliouitisha kwa ajili ya kusikiliza na kutatua kero mbalimbali za Wananchi wa Kijiji cha Ijumbi kilichopo Kata ya Ruiwa Wilaya ya Mbarali siku ya tarehe 17/11/2017.

Akiongea na wananchi wa Kijiji hicho katika mkutano huo, Mhe mfune alisema kuwa, alipokwenda katika Kijiji hicho mwezi uliopita aliwaambia kuwa jukumu la kumuondoa Mwenyekiti na Wajumbe ni la wananchi waliomchagua, na angeagiza Halmashauri ambayo inasimamia Vijiji waendelee na mchakato kama mwenyekiti hatoshi kwa mujibu wa tuhuma zake aondolewe kwa kwa kufuata utaratibu uliowekwa kwa mujibu wa Sheria, wataalamu walishakuja na utaratibu umetumika kwa ajili ya kumuondoa mwenyekiti, vilevile  kama Mwenyekiti hajaridhika na maamuzi ya kumuondoa anaweza kwenda kukata rufaa kwa Mkuu wa Mkoa.

“Sikuja hapa kuja kuwalinda watu waliochaguliwa kama hawafai kuendeleza Kijiji, kama hawawezi kupeleka maendeleo yetu mbele,wapo kwa maslahi yao na tuna uhakika na ushaidi basi utaratibu ufuatwe kuwaondoa”

Kuhusu suala la kusoma mapato na matumizi ya Kijiji, Mhe Mfune ameagiza ndani ya siku saba uitishwe mkutano mkuu wa Kijiji kwa ajili ya kuwasomea wananchi mapato na matumizi ya Serikali yao, vilevile ameagiza kila baada ya miezi mitatu wananchi wasomewe mapato na matumizi ya Serikali yao.

Mhe. Mfune amewaasa Serikari ya Kijiji kutojichukulia madaraka ya kufanya kila kitu bila ya kupata ridhaa ya wananchi kupitia mikutano mikuu ya Kijiji, vitu vyote vinavyoletwa kwa ajili ya maslahi ya wananchi kutoka sehemu mbalimbali, mfano mabati, simenti na mengineyo  lazima kuwaeleza wananchi, Serikali ya Kijiji inatakiwa kupendekeza matumizi ya bidhaa hizo na kuwasilishwa kwa wananchi kwa ajili ya kupitisha matumizi yake.

Kuhusu suala la mifugo maeneo ya misitu katika Vijiji vya Motomoto na Malamba, Mhe Mkuu wa Wilaya alishapiga marufuku kwa wale wanaolima, wanaojenga na wanaochunga mifugo yao kwenye maeneo hayo au kwenda kufanya shughuli za kibinadamu kwani kufanya hivyo  kunaharibu eneo la hifadhi ya misitu ambayo ni vyanzo vikubwa vya maji katka maeneo Wilaya yetu, na kuna watu wanaohusika na amewaweka kwa ajili ya kulinda eneo hilo la hifadhi ya misitu, kwa maeneo ambayo watu wanakata miti na wanachoma mkaa hasa kata ya Ipwani, kuna  baadhi ya watu wameshawakamatwa na wapo polisi na magari yao na watachukliwa hatua kwa mujibu wa sheria.

 Akizungumza katika mkutano huo, Afisa Utumishi na Utawala wa Halmashauri ya Wilaya ya Mbarali, Ndg. Aswege Kaminyoge, alitoa utaratibu wa kuwaondoa viongozi wa Serikali za Vijiji ambapo alieleza kuwa, Halmashauri za Wilaya, Miji, Manispaa, Majiji pamoja na Vijiji zimeanzishwa na sheria namba 7 ya mwaka 1982, ni utaratibu wa kisheria kwa Serikari ya Kijiji kufanya shughuri za kila siku za uendeshaji wa Kijiji.

“kwa mujibu wa sheria kwa Vijiji vilivyosajiliwa vinatakiwa kukutana kila baada ya miezi mitatu ambayo ni mara nne kwa mwaka, mwenyekiti wa Serikari ya kijiji pamoja na Mtendaji wa Kijiji kwa kushirikiana na wajumbe wa Serikali ya kijiji wana wajibu wa kuitisha mikutano hiyo”

Kaminyoge aliongeza kuwa, suala la kumuondoa Mwenyekiti madarakani pamoja na wajumbe wa Serikali, kwa  mujibu wa taratibu na kanuni zilizotungwa mwaka 1995, wenye mamlaka ya kumuondoa Mwenyekiti ni Halmashauri ya Serikali ya Kijiji yenye watu 25 kwa kupiga kura mara baada kupitia tuhuma zilizopatikana kwenye mikutano mikuu ya Vijiji kwa wananchi ambao walimchagua.

Kwa upande wa Wajumbe wa Serikali za Vijiji, alisema kuwa, wenye mamlaka ya kuwaondoa madarakani ni mkutano mkuu wa Kijiji, kama mjumbe ana tuhuma au ana mwenendo mbaya katika Serikali, kitakachofanika ni kwamba, itatolewa hoja ya kutokuwa na imani na mjumbe huyo, anaweza akawa mmoja au wawili au zaidi waliotuhumiwa, itajadiliwa kwenye mkutano huo, baada ya hapo itapigwa kura ya kutokuwa na imani nae au nao, ili kuweza kuwaondoa wanatakiwa kufuata utaratibu huo.