Maafisa Waandikishaji wa CHF iliyoboreshwa wakabidhiwa Simu Janja Mbarali

Tarehe ya Kuanza: October 23rd, 2020

Mkuu wa Wilaya ya Mbarali Mhe. Reuben Mfune amekabidhi vitendea kazi aina ya Simu janja 50 kwa maafisa waandikishaji wa Mfuko wa Afya ya Jamii iliyoboreshwa (ICHF) kwenye ukumbi wa ofisi yake siku ya tarehe 23/10/2020 ili ziweze kuwasaidia kuwafikia wananchi wengi zaidi katika maeneo wanayofanyia kazi.

Akizungumza katika makabidhiano hayo Mhe. Mfune amempongeza Mkurugenzi Mtendaji wa Halmashauri ya Wilaya ya Mbarali Ndg. Kivuma Msangi kwa kutekeleza agizo alilolitoa siku ya tarehe 13/05/2020 la  kununua simu 102 kwa awamu na hadi kufikia sasa ameweza kununua simu 50 zenye thamani ya kiasi cha shilingi 8,500,000 ili   kutatua changamoto zinazowakabili maafisa waandikishaji wa ICHF wilayani hapa.

“Simu zilizonunuliwa zitaongeza chachu ya kuandikisha kaya nyingi zaidi ikiwa ni pamoja na kuhuisha kaya zilizoandikishwa awali zaidi ya mwaka mmoja uliopita. Zingatieni lengo la kuandikisha angalau kaya 20 kwa mwezi kwa kila mwandikishaji ili kufikia lengo la wilaya la kuandikisha kaya 20,000 kwa mwaka.”

“Ninawataka maafisa waandikishaji wa CHF iliyoboreshwa mtunze simu hizi kama mali yenu ili muwendelee kuihudumia jamii mnayoishi nayo. Huduma ya uandikishaji imesogezwa kwenu mkiwa kama sehemu ya jamii ili kumwondolea usumbufu na umbali mwananchi kupata huduma hiyo mara anapoenda Hospitali au kituo cha afya.” Alisema Mhe Mfune

Mratibu wa Mfuko wa Bima ya Afya ya iliyoboreshwa (ICHF) Ndg. Stephen Bitta alisema kuwa Halmashauri ya Wilaya ya Mbarali imeanza utekelezaji wa mfuko huo mwezi Mei 2019 na hadi kufikia sasa Wilaya imeandikisha jumla ya kaya 1,614 sawa 2.3% ya lengo zima la kaya 69,667 au  sawa na 8.07% ya lengo la mwaka la kaya 20,000.

Aliongeza kuwa Uandikishaji wa wanachama wa ICHF umetofautiana kati ya Kitongoji, Kijiji na Kata moja na nyingine kutokana na sababu mbalimbali hususan mwitikio wa jamii, uwezo wa waandikishaji walioteuliwa, vitendea kazi pamoja na mwingiliano wa tatizo la maamubukizi ya ugonjwa wa Korona (Covid-19.)

Wakizungumza kwa niaba ya wenzao kwenye zoezi wa ugawaji wa vitendea kazi hivyo, maafisa waandikishaji wa Mfuko wa Bima ya afya ya Jamii iliyoboreshwa wameushuruku uongozi wa Wilaya kwa kuwapatia vitendea kazi vya simu janja ambazo kwa sasa zitawaongezea ari ya kufanya kazi kwa bidii kwani simu hizo ni za kisasa na zinakwenda na wakati uliopo.

MWISHO