MADIWANI HALMASHAURI YA WILAYA YA MBARALI WAPIGWA MSASA MAFUNZO ELEKEZI.

Tarehe ya Kuanza: January 20th, 2026

Takribani Madiwani 26 kutoka katika Kata za Halmashauri ya Wilaya ya Mbarali wameanza kupatiwa mafunzo elekezi kutoka kwa Wakufunzi na wawezeshaji leo Januari 20, 2026 katika Ukumbi wa Halmashauri ya Wilaya hiyo. 

Madiwani hao wameanza mafunzo hayo ya siku mbili ambayo yanatolewa na Mkufunzi Eustard Ngatale ambaye ni Mwanasheria na wawezeshaji Beyond Samwel Madege na Dkt. Wakara Ibrahim Nyabakora, ambapo mafunzo hayo yamelenga kuwajengea uwezo katika kufahamu Sheria, Kanuni, Taratibu na miongozo itakayowasaidia katika kutekeleza majukumu ya kuwatumikia wananchi. 

Akizungumza baada ya kumaliza siku ya kwanza ya mafunzo hayo, Mhe. Diwani Safi Hamidu Almasi ambaye aliteuliwa kuwa Mwenyekiti wa washiriki wa mafunzo amesema ushiriki wao utasaidia kuwaongezea uwezo Madiwani ambao walikuwepo kwenye nafasi hizo awamu iliyopita na kuwajengea uwezo na uzoefu wale ambao wanashika nafasi hizo kwa mara ya kwanza. 

“Tumepata uzoefu kuhusu Sheria na taratibu namna ya kushirikiana kuanzia ngazi ya Kata mpaka Halmashauri, natoa wito Madiwani wenzangu tukirejea kwenye utendajio tufanye vile ambavyo tumeelekezwa na tusiende nje ya utaratibu”, amesema Mhe. Safi Hamidu Almasi.

Kwa upande wake Mwenyekiti wa Halmashauri ya Wilaya ya Mbarali ambaye ni Diwani wa Kata ya Itamboleo, Mhe. Twalib Tamimu Lubandamo amesema mafunzo hayo ni dira ya kuwafanya kuwa viongozi bora na pia itawapa misingi ya utawala na uelewa wa mipaka na ukomo wa madaraka yao.

“Tunamshukuru sana Mhe. Rais Dkt. Samia Suluhu Hassan kwa kuona umuhimu kuwaleta wakufunzi kutupitisha kwenye haya mafunzo kwani yatatufanya Madiwani tujitambue na kuyatambua majukumu yetu kwa wananchi kwenye ngazi ya Kata mpaka Halmashauri”, amesema Mwenyekiti Mhe. Lubandamo.

Mafunzo hayo yanatarajiwa kuhitimishwa kesho Januari 21, 2026 ambapo Muwezeshaji Beyond Samwel Madege kutoka Chuo cha Serikali za Mitaa Hombolo, Dodoma amesema Madiwani hao watapatiwa mafunzo maeneo mbalimbali ikiwemo masuala ya uongozi na utawala bora, Sheria, ardhi, Miundo pamoja na Haki na Stahiki.