Madiwani Kyela Wafanya Ziara ya Mafunzo Mbarali

Tarehe ya Kuanza: November 29th, 2017

Waheshimiwa Madiwani kutoka Halmashauri ya Wilaya ya Kyela wakiongozwa na Mwenyekiti wa Halmashauri hiyo  Mhe. Hunter A. Mwakifuna pamoja na baadhi ya Wataalamu wamefanya ziara ya kujifunza namna ya matumizi ya bora ya “Force Account” na namna bora ya kuzuia vifo vya mama na mtoto katika Halmashauri ya Wilaya ya Mbarali siku ya tarehe 28/11/2017.

Akiwakaribisha wageni hao Mwenyekiti wa Halmashauri ya Wilaya ya Mbarali Mhe. Francis Mtega, alishukuru ujio wa wageni hao na kuwatajia fursa mbalimbali zinazopatikana Wilayani hapa, ikiwemo kilimo cha mpunga ambacho kinatumia maji kidogo na ndio chanzo kikubwa cha mapato ya Halmashauri ya Wilaya ya Mbarali.

Katika ziara hiyo wameweza kujifunza matumizi ya “Force Account (utekelezaji wa kazi kwa kutumia mafundi wa kawaida bila ya kutumia wakandarasi)” kutoka shule ya Sekondari Rujewa ambapo, Ofisi ya Rais TAMISEMI kwa kushirikiaa na Wizara ya Elimu Sayansi na Technolojia kupitia Program ya Lipa Kulingana na Matokeo (P4R) ilitoa fedha za ujenzi na ukarabati kupitia akaunti ya shule ya Sekondari Rujewa kiasi cha Tsh. 259,000,000.00/=. Fedha hizo zilitakiwa zitumike katika Ujenzi wa Miundombinu, kama Ujenzi wa Mabweni Mawili (2) kwa ajili ya kidato cha tano na sita pamoja na vitanda,mabweni hayo yana uwezo wa kuchukua wanafunzi 80 kwa kila moja kwa gharama ya Tsh. 150,000,000.00, Ujenzi wa vyumba vinne (4) vya madarasa vyenye meza na kiti kwa thamani ya Tsh. 80,000,000.00/=, Umaliziaji/ukarabati wa maabara kwa thamani ya Tsh.18,000,000.00 pamoja na Ujenzi wa matundu kumi ya vyoo kwa thamani ya Tsh.11,000,000.00

Wakiwa katika zahanati ya Uturo ambayo ndio zahanati ya mfano kitaifa katika kudhibiti vifo vya mama na mtoto, zahanati hiyo kwa muda wa miaka 19, Tangu mwaka 1998 hakuna vifo vya watoto wachanga wala wazazi vinavyotokana na matatizo ya uzazi vilivyotokea katika kijiji cha Uturo. Wakiwa katika zahanati hiyo iliyopo Wilaya ya Mbarali kata ya Mapogoro kijiji cha Uturo wameweza kujifunza mambo mablimbali ambayo yatasaidia kupunguza na kukomesha vifo dhidi ya mama na mtoto.

Mwenyekiti wa Halmashauri ya Wilaya ya Kyela, Mhe Hunter A. Mwakifuna amemshukuru Mganga mfawidhi ndugu Wilson Chotamganga na Wananchi wa Kijiji cha Uturo kwa juhudi zao na kuweza kufanikisha jambo hilo.

“Wananchi wameelewa kuwa zahanati hii ni mali yao, na wametusubiri tangu asubuhi, namshukuru Mganga mfawidhi ndugu Wilson Chotamganga na namtakia kila la kheri katika likizo yake ya kustaafu” alisema Mhe. Mwakifuna

Naye Mkurugenzi Mtendaji wa Halmashauri ya Wilaya ya Kyela Ndg Mussa J. Mgata amepongeza ubunifu uliofanyika katika zahanati hiyo na kuahidi kuwachukua baadhi ya wataalamu na akinamama waliounda kikundi cha kupambana na vifo vya mama na mtoto kwenda Wilayani Kyela kutoa mafunzo.

Makamu Mwenyekiti wa Halmashauri ya Wilaya ya Mbarali Mhe. Broun Kwakibete amewashukuru kwa kufanya ziara ya kuja kujifunza mambo kuhusu matumizi ya "Force Account" na namna ya Kuzuia Vifo vya Mama na Mtoto, na ameahidi kuwa nao watakwenda kujifunza mambo mbalimbali katika Halmashauri ya Wilaya ya Kyela.