MAWAZIRI 8 WATUA MBARALI KWA AJILI YA MPAKA WA HIFADHI YA TAIFA RUAHA

Tarehe ya Kuanza: February 15th, 2019

Mawaziri 8 kutoka wizara zinazohusika na suala la Hifadhi ya rasilimali maji na maliasili  wakiongozwa na Waziri wa Ardhi, Nyumba na Maendeleo ya Makazi Mhe. William Lukuvi wamewasili Wilayani Mbarali mkoani Mbeya kwa ajili ya kushughulikia  pamoja na kutafuta suluhu ya mgogoro wa mipaka kati ya Hifadhi ya Taifa ya Ruaha na vijiji 33 vilivyopo katika Wilaya ya Mbarali siku ya tarehe 15/02/209.

Mawaziri hao ni Waziri wa Ardhi, Nyumba na Maendeleo ya Makazi Mhe. William Lukuvi, Waziri wa Maliasili na Utalii, Mhe. Dk Hamisi Kigwangalla, Waziri wa Maji na Umwagiliaji, Mhe. Profesa Makame Mbarawa, Waziri wa Tawala za Mikoa na Serikali za Mitaa (TAMISEMI), Mhe. Seleman Jafo.

Waziri wa Ulinzi na Jeshi la Kujenga Taifa, Mhe. Dk Hussein Mwinyi, Naibu Waziri, Ofisi ya Makamu wa Rais (Muungano na Mazingira), Mhe. Musa Sima na Waziri wa Mifugo na Uvuvi, Mhe. Luhaga Mpina.

Akizungumza na baadhi ya wananchi pamoja na viongozi mbalimbali waliohudhuria katika ukumbi wa polisi uliopo Kata ya Rujewa, Mhe. Lukuvi alisema kuwa hawajafika kuja kutoa majibu ya mgogoro huo, bali wamekuja kwa ajili ya kujionea hali halisi ili waweze kumshauri Mhe. Rais kuhusiana na Mgogoro huo.

Mawaziri hao waliweza kutembelea eneo lenye mgogoro huo kabla ya kuzungumza na wananchi pamoja na viongozi mbalimbali waliopo wilayani hapa.

Vijiji 33 vipo ndani ya hifadhi kwa mujibu wa Tangazo la Serikali namba 28 la mwaka 2008 (GN No.28 ya 2008), hivyo vimekuwa kwenye mgogoro kwa muda wa miaka 10.

Januari 15, 2019, Rais wa Jamhiri ya Muungano wa Tanzania Mhe. Dr. John Pombe Magufuli aliagiza vijiji vyote 366 vilivyobainishwa kuwepo ndani ya maeneo ya Hifadhi za Taifa nchini visiondolewe na badala yake wizara husika zianze kufanya mchakato wa kuvirasimisha huku akitoa muda wa mwezi mmoja kwa viongozi kubainisha maeneo ya vijiji hivyo na kuanzisha mchakato wa mabadiliko ya sheria ili yawasilishwe katika kikao cha Bunge.