Mbarali watakiwa Kupunguza Migogoro na Wawekezaji

Tarehe ya Kuanza: July 30th, 2018

WAKAZI wa kijiji cha Kapunga, kata ya Itamboleo wilayani Mbarali mkoani Mbeya wametakiwa kupunguza migogoro na mwekezaji Kampuni ya Kapunga Rice Project Limited na badala yake wajipange kunufaika na uwepo wa kampuni hiyo jirani nao.

Miongoni mwa mambo watakayonufaika nayo ni pamoja na ujenzi wa miradi ya maendeleo iwapo watakaa chini na kuiibua ili kampuni hiyo iwasaidie kuitekeleza.

Makamu wa Rais wa Jamhuri ya Muungano wa Tanzania Mhe. Samia Suluhu Hassan alitoa rai hiyo akiwa ziarani wilayani Mbarali alipoweka jiwe la msingi katika Kituo cha Afya kilichojengwa na kampuni ya Kapunga Rice ambapo hadi sasa zimetumika shilingi milioni 530 lakini hadi kukamilika kwa ujenzi zitatumika Shilingi Milioni 625.

Kwa mujibu wa Katibu Tawala wilaya ya Mbarali, Ezekiel Kilemile maandalizi ya ujenzi wa Kituo hicho yalianza Septemba 2017 na ujenzi ukaanza Januari mwaka huu na hadi sasa kazi inaendelea chini ya usimamizi wa Serikali ya kijiji cha Kapunga.

Kilemile alisema pia Kampuni ya Kapunga imeahidi kununua vitendea kazi mara baada ya kukamilika kwa ujenzi wa majengo na alivitaja vifaa hivyo kuwa ni vitanda,  meza, makabati, skrini na kompyuta vyenye gharama ya jumla ya shilingi milioni 70 hivyo mchango wa jumla wa kampuni utakuwa shilingi milioni 695 ikijumuishwa na ujenzi.

Katibu Tawala huyo alisema pia katika kuunga mkono juhudi za kampuni hiyo za kuwafikishia wananchi huduma za afya karibu, Halmashauri ya wilaya Mbarali imechangia zaidi ya shilingi milioni 14.6 kwaajili ya kufikisha umeme kwenye kituo hicho cha afya kitakachokuwa na uwezo wa kuwa na vitanda 42 kwa wakati mmoja kwa wagonjwa wa aina tofauti.

Kufuatia mchango huo, Mhe. Suluhu alisema ni wakati kwa wakazi wa kijiji cha Kapunga na vingine vilivyopo jirani na eneo la Kampuni hiyo kuacha kuzalisha migogoro isiyo na tija na badala yake waone manufaa yanayopatikana kutokana na uwepo wa kampuni husika.

“Kama awali Kampuni ilikuwa ijenge zahanati baadaye mkaiomba iwajengee Kituo cha afya na ikakubali hii ni faida kubwa kwenu.Sasa achene migogo maana huku Mbarali kumekuwa kila kukicha tunasikia migogoro.Tumieni fursa hii ili kila mwaka msaidiane na kampuni kufanya maendeleo.Wasaidieni pia wawekezaji wanaokuja huku ili nao wazalishe kwa faida ili nanyi mnufaike zaidi”alisisitiza makamu wa rais.

Mhe. Suluhu pia aliahidi Serikali kuchangia katika ujenzi wa nyumba za watumishi wa kituo hicho unaoendelea ambapo kwa sasa wananchi wanatoa michango ya hali na mali ili kuendeleza ujenzi wa jengo moja lenye uwezo wa kuishi familia za watumishi wawili.

Kwa upande wake Naibu Spika wa Bunge Mhe Tulia Akson Mwansasu aliahidi kuchangia mifuko 200 kupitia Taasisi ya Tulia Trust kama mchango wake kwenye ujenzi wa nyumba za watumishi wa kituo hicho cha Afya.