MFUNE ATOA WIKI MBILI KWA WALIOKAIDI KUPISHA UPANUZI WA BARABARA KUPISHA MARA MOJA

Tarehe ya Kuanza: April 21st, 2018

Mkuu wa Wilaya ya Mbarali Mhe. Reuben Mfune ametoa muda wa wiki mbili kuanzia siku ya jumatatu ya tarehe 23 Aprili, 2018 kwa wote waliokaidi kupisha upanuzi wa barabara kupisha mara moja kabla hatua za kisheria hazijachukuliwa dhidi yao ikiwamo kulipia gharama za ubomoaji utakaofanyika.

Mhe. Mfune ametoa agizo hilo alipofanya ziara ya Kukagua ujenzi barabara ya km 6.6 inayojengwa na Tanroad kutoka Mdodela hadi Ubaraku katika kata ya Ubaruku iliyopo Wilaya ya Mbarali siku ya tarehe 20 Aprili, 2018.

“Muda wa kubomoa ulishapita tangu mwezi Novemba 2018, wale wote ambao hawajatekeleza itatumika nguvu” alisema

Akizungumza katika ziara hiyo msimamizi wa mradi huo kutoka kampuni ya Summer Communications Limited kwa kushirikiana na kampuni ya Mtwivila Traders alisema kuwa kipande cha barabara walichokabidhiwa kutoka Mdodela  hadi Ubaruku kina urefu wa Km 6.6 na kinajengwa kwa kiwango cha lami ya tabaka mbili pamoja na uwepo wa kalavati 9 zenye ukubwa wa sentimeta 90.

Vilevile alisema kuwa, ujenzi wa barabara hiyo ulianza tangu August 12, 2017 na unatarajiwa kumalizika August 12, 2018 mkataba wa mwaka mmoja na utagharimu kiasi cha shilingi bilioni 6.197 za Kitanzania na hadi kufikia sasa ujenzi umekamilika kwa asilimia 35 na muda uliotumika ni asilimia 60 ila kwa sasa kazi za msingi zote zimekamilika na sehemu iliyobaki haina changamoto kubwa katika umaliziaji.

Msimamizi huyo aliongeza kuwa, changamoto walizokutananazo ni pamoja na kutotambulika kwa baadhi ya vitu kipindi tathmini ya mradi ikiwamo Mchanga na kuoza kwa barabara, changamoto ya mvua ambayo ilisababisha kujaa kwa mashimo, wizi wa vibao vya barabarani, upatikanaji wa vibari vya Kokoto, upatikanaji wa udongo ambao unapatikana mbali na eneo la sehemu ya mradi pamoja na kazi ya uchanganyaji wa udongo na Mchanga ambayo inachukua muda mrefu.