Mhe. Rais Magufuli awataka wananchi wa Mbarali wasubiri uamuzi wa Serikali juu ya hatma ya Vijiji 33 vilivyopo ndani ya Hifadhi

Tarehe ya Kuanza: May 3rd, 2019

Rais wa Jamhuri ya Muungano wa Tanzania Mhe. Dkt John Pombe Magufuli amewataka wakazi wa Wilaya ya Mbarali mkoani Mbeya kuendelea kuvuta subira wakati wakisubiri uamuzi wa Serikali juu ya hatma ya vijiji 33 ambavyo kutokana na Tangazo la Serikali namba 28 la mwaka 2008 (GN namba 28) inavitaja kuwepo ndani ya Hifadhi ya Taifa ya Ruaha.

Mhe.Rais Magufuli aliyasema hayo siku ya tarehe 02/05/2019 alipohutubia mkutano wa hadhara katika uwanja wa Barafu uliopo katika Kata ya Rujewa wilayani Mbarali.

Alisema kuwa, ripoti ya Tume ya Mawaziri nane iliyoundwa ilikwisha kamilisha kazi yake na kukabidhi taarifa kitakachofuata ni kumalizia mgogoro huo.

Amewataka wakazi wa Mbarali kuondoa hofu kwani atahakikisha maamuzi yatakayofanyika yanabeba maslahi mapana ya wananchi wa Mbarali hasa ikizingatiwa kuwa wana uhitaji mkubwa wa ardhi kwaajili ya shughuli za kilimo na ufugaji

 “nataka niwaambie ndugu zangu wa Mbarali, Serikali mliyoiweka madarakani kamwe haiwezi kuwaonea, naomba mtuamini tufanyie kazi ripoti ya Mawaziri na tutaleta majibu, lakini kile kijiji cha machimbo ambacho wananchi wake walidai fidia na walilipwa takribani shilingi Milioni 800, hao itabidi waondoke” 

Aidha Mhe. Rais amewaagiza Waziri wa Ardhi, Nyumba na Maendeleo ya Makazi, Mhe. Willium Lukuvi, Mkuu wa Mkoa wa Mbeya Mhe. Albert Chalamila, Mkuu wa Wilaya ya Mbarali Mhe. Reuben Mfune na Mkurugenzi Mtendaji wa Halmashauri Wilaya ya Mbarali Ndg. Kivuma Msangi, kumpelekea orodha ya wananchi waliogawiwa ekali 6027 kutoka kwa wawekezaji waliogawiwa mashamba ya Mpunga ya Kapunga na Highland Estate.

Pamoja na kuagiza apatiwe orodha hiyo Mhe. Rais Magufuli amempongeza mwekezaji wa shamba la Highland Estate ambae ni Mbunge wa Jimbo la Mbarali Mhe. Haroon Mulla Pirmohmed kwa kuachia sehemu ya shamba na kutoa Matrekta madogo 102 (Power Tillers) kwa vijiji vyote vya Jimbo la Mbarali na amewaonya watu wanoafanya udalali wa kuwakodisha wakulima mashamba  kwa gharama kubwa ikilinganishwa na kiwango kilichowekwa na wawekezaji hao.

Vilevile amewaonya wananchi wa Wilaya ya Mbarali kuacha majungu dhidi ya viongozi wao akiwemo Mhe. Mbunge na amewasihi kushikamana na kujielekeza kuijenga Wilaya yao ya Mbarali kwani  majungu wanayoyafanya kwa viongozi wao yanawachelewesha kufanya maendeleo.

Kwa upande wake Mhe. Waziri Lukuvi alisema ripoti ya tume ya Mawaziri nane iliyokuwa maalumu kwaajili ya kupitia maeneo yenye mgogoro wa ardhi kati ya vijiji na hifadhi za Taifa nchini ilikwisha kabidhiwa kwa Katibu Mkuu Kiongozi ikiwa na mapendekezo yaliyozingatia maoni ya wananchi wakiwemo wa Mbarali.

Mhe. Lukuvi alisema ripoti hiyo imebeba kwa asilimia kubwa ukweli wa unafuu kwa wakazi wa wilayani hapa hivyo muhimu kwao ni kuvuta subira.

Kwa upande wake Mbunge wa Jimbo la Mbarali, Mhe. Mhe. Haroon Mulla Pirmohmed aliishukuru Serikali kwa jitihada inazofanya katika kushughulikia suala la GN namba 28 akisema ni jambo linaloleta faraja kwa wananchi wanyonge.

Mwisho.