Mikopo Inayotolewa Itumike Kujenga Viwanda-Mfune

Tarehe ya Kuanza: October 18th, 2019

Mkuu wa Wilaya ya Mbarali Mhe. Reuben Mfune amewataka wakazi wa Mbarali wenye sifa za kujiunga kwenye vikundi wajiunge ili waweze kunufaika na mikopo ya asilimia 10 inayotolewa na Halmashauri kwa ajili ya Wanawake, Vijana na watu wenye Ulemavu ili waweze kuanzisha viwanda,  kujiajiri na kutoa ajira kwa wengine.

Ameyasema hayo siku ya 17/10/2019 alipotembelea kiwanda cha kutengeneza Sabuni (Mbarali Soap) kinachomilikiwa na Kikundi cha Umoja wa Watu wenye Ulemavu Mbarali (UWALEMBA) ambacho kimewezeshwa na Halmashauri ya Wilaya ya Mbarali mkopo wa kiasi cha shiling 46,710,000  na kuweza kuanzisha kiwanda kidogo ambacho kinatoa ajira kwa watu 12 wakiwemo wenye ulemavu 6 na wasio na ulemavu 6.

“Nimefurahishwa sana na kuanza kwa uzalishaji huu kwani sijawahi kuona kikundi chenye mtazamo wa mbali kama huu,  nawasihi wananchi wengine wa wilaya ya Mbarali kuiga mfano huu na kufanya kitu kikubwa zaidi ya hiki kwani Serikali ipo kwa ajili ya wananchi hivyo wasiogope kuthubutu.” 

“Vikundi vijiunge vifanye kitu kikubwa zaidi kwani fedha zipo na zinatolewa kila mwaka. Halmashauri iendelee kufikiria kuwakopesha watu wenye maono makubwa zaidi ya kuanzisha viwanda vya uzalishaji wa bidhaa mbalimbali kama walivyofanya Kikundi cha Umoja wa Watu wenye Ulemavu ambao wameanzisha kiwanda cha kutengeneza Sabuni.” Alisema Mhe. Mfune.

Aidha katibu  wa  kikundi cha Umoja wa Watu Wenye Ulemavu Mbarali (UWALEMBA)  Ramadhani J. Shamte  ameiomba Serikali kuendelea kuunga mkono juhudi zao ikiwa ni pamoja na kuwasaidia kupata eneo kubwa zaidi kwa ajili ya shughuli ya uzalishaji pamoja na kupata soko la bidhaa zao ambazo ni Sabuni za Kufulia, kuogea, sabuni za maji pamoja na mafuta ya kupaka.

Kiwanda cha Kutengeneza Sabuni, Mbarali Soap kinapatikana kata ya Rujewa Kitongoji cha Uhamila. Kiwanda hicho kinazalisha Sabuni za kufulia, kuogea, sabuni za maji pamoja na mafuta ya kupaka. Kiwanda kina kaulimbiu ya OGA, FUA, PAKA,  na kimetoa ajira kwa watu wenye ulemavu pamoja na wasio na ulemavu.

MWISHO