MILIONI 151 ZIMEPATIKANA KUWEZESHA UJENZI WA VYUMBA VYA MADARASA MBARALI- RC MBEYA

Tarehe ya Kuanza: December 18th, 2019

Hayo yamesemwa na Mkuu wa Mkoa wa Mbeya Mhe. Albert Chalamila siku ya tarehe 18/12/2019 kwenye Harambee kubwa iliyoitishwa na Mkuu wa Wilaya ya Mbarali Mhe. Reuben Mfune katika ukumbi wa Polisi uliopo Rujewa Mbarali kwa ajili ya kuchangia ujenzi wa miundombinu ya vyumba 36 vya madarasa.

Mhe. Chalamila alisema kuwa jumla ya kiasi cha cha Tsh. 151,677,583/= Miloni zimepatikana kwenye Harambee hiyo kati ya shilingi 288,705,000/= ambazo zilikuwa zinahitajika kwa ajili ya ununuzi wa vifaa vya ujenzi ili ifikapo Januari 9, 2020 wanafunzi wote waliochagulia waweze kuanza kidato cha kwanza.

Kati ya fedha zilizopatikana, shilingi 61,017,583/= milioni ni fedha taslimu, shilingi 51,680,000/= milioni ni ahadi pamoja na shilingi 38,583,000/= milioni ni vifaa vya ujenzi.

“Ndugu zangu mlichokifanya leo hii ni majitoleo na sadaka kubwa sana kwa Mungu na kwa watoto wetu tunaowahangaikia. Sio jambo dogo kwa kipindi hiki cha kilimo watu kujitoa na kupatikana kiasi chote hiki cha fedha, huu ni upendo wa kipekee mno, niwashukuruni sana lakini niushukuru uongozi Mbarali kwa kuwa wabunifu kwa kiasi kikubwa”.

“Kwa Mkoa wote wa Mbeya tuna upungufu wa vyumba vya madarasa 59, ila kwa Mbarali peke yake kuna upungufu wa vyumba 36 ambapo ni zaidi ya alilimia 50, tatizo hili limetokana na elimu bure inayotolewa serikali ya awamu ya tano inayoongozwa na Rais wa Jamhuri ya Muunngano wa Tanzania Mhe. Dkt John Pombe Magufuli, tuchangie maendeleo, Mbarali ni yetu sote.” Alisema Mhe. Chalamila

Vilevile Mkuu wa Mkoa amemshukuru Msanii Masanja Mkanamizaji (Emanuel Mgaya) kwa kushereheza vizuri Harambee hiyo na kupelekea watu kujitoa kwa wingi kuchangia ujenzi wa vyumba vya madarasa.

Mkuu wa Wilaya ya Mbarali Mhe. Reuben Mfune alisema kuwa wananchi wa Mbarali wanafanya kazi kwa bidii sana kwani kuna ujenzi wa shule 9 mpya unaendelea, na vilevile kuna ujenzi vyumba vya madarasa unaoendelea kwenye shule zilizokuwepo.

Mhe. Mfune aliongeza kuwa vyumba vyote 36 vinatakiwa kukamilika kabla ya Januari 9 2020 ili watoto wetu waweze kuanza kidato cha kwanza na fedha ambazo zitapatikana hapa zitawaongezea nguvu wananchi ili waweze kupata vifaa mbalimbali vya ujenzi.

Mwenyekiti wa Halmashauri ya Wilaya ya Mbarali Mhe. Francis Mtega alisema kwamba elimu ni kitu muhimu sana, watu wengi ni mahodari kuchangia kwenye harusi na kusahau kuwa elimu ni urithi halisi wa kila kijana, namshukuru Mkuu wa Mkoa wa Mbeya kwa kutekeleza ahadi zote alizozitoa na ametufundisha kwa vitendo kwamba tuheshimu na kuijali sana elimu.

Mkurugenzi mtendaji wa Halmashauri ya Wilaya ya Mbarali Ndg. Kivuma H. Msangi alisema kuwa Wilaya ya Mbarali ina jumla ya shule za sekondari 25 kati ya hizo 18 ni za Serikali na uhitaji wa vyumba vya madarasa na madawati unatokana na ongezeko kubwa la ufaulu wa wanafunzi waliofanya mtihani wa darasa la saba mwaka 2019 ambapo jumla ya wanafunzi wa 5,578 walifanya mtihani na wanafunzi 4,800 walifaulu sawa na asilimia 86.6 ikilinganishwa na ufaulu huo kwa mwaka 2018 ambao ulikuwa ni asilimia 70.1.

MWISHO