Milioni 400 Kuboresha Kituo cha Afya Utengule Usangu Mbarali

Tarehe ya Kuanza: January 26th, 2018

“Jumla ya kiasi cha Tsh. Milioni Mia Nne (400,000,000/=) zimeletwa katika Kata ya Utengule Usangu kwa ajili ya kuboresha Kituo cha Afya.”

Hayo yamesemwa na  Katibu Tawala ya Wilaya ya Mbarali Ndg. Ezekia Kilemile akimwakilisha Mh. Mkuu wa Wilaya kwenye Mkutango wa hadhara na wananchi wa Kata ya Utengule Usangu aliouitisha kwa ajili ya kuwakabidhi mradi wa uboreshaji wa kituo cha cha afya Utengule Usangu.

Akihutubia katika mkutanoa huo uliohudhuliwa na Kamati ya Ulinzi na Usalama ya Wilaya pamoja na Kamati ya Maendeleo ya Kata (WDC), katibu Tawala alisema kuwa fedha hizo zinatakiwa kujenga Majengo zaidi ya sita (6) pamoja na kufanya ukarabati katika Majengo yaliyopo ambayo jumala yake yanafikia kumi na nne (14), ambayo yamewekwa kwa mujibu wa maelekezo ya Serikali.

Majengo hayo ni Ujenzi wa Jengo la Maabara, Jengo la Upasuaji, Jengo la Wodi ya Watoto, Jengo la Wodi ya Wazazi, Jengo la Nyumba ya Mtumishi, Jengo la kuhifadhia Maiti, Ujenzi wa Tanuru la kuchomea takataka, kufanya ukarabati wa mtandao wa maji, ukarabati wa Jengo la Wangonjwa wa nje (OPD), ukarabati wa Jengo la CTC, ukarabati wa Jengo la Wanaume na Wanawake pamoja na kuunganisha umeme katika Majengo yote. Majengo yote yanatakiwa kujengwa kwa viwango vilivyokubalika.

Kilemile alisema kuwa jumla ya Kamati nne zimeundwa ili kuhakikisha fedha hizo zinafanya kazi kubwa. Kamati hizo ni Kamati ya Ujenzi, Kamati ya Mapokezi, Kamati ya Manunuzi na Kamati ya Usimamizi. Kamati hizo zote zitasimamia Ujenzi kwa ujumla ikiwemo kuhakikisha fedha zilizopo zitatumika kununua bidhaa kwa bei ya sokoni bila kufuta utaratibu wa wazabuni.

Katibu Tawala aliongeza kuwa, kuna mambo ambayo jamii inatakiwa ishiriki ikiwamo kutoa nguvu kazi ili kusaidia kazi zitakazokuwa zinafanyika kwenye mradi ikiwemo kuchangia tofari kutoka kila Kijiji, Mchanga, pamoja na Mawe, kwani fedha hizi zimeletwa ili ziweze kusaidiana na nguvu za wananchi ambao wana jukumu la kujenga Kituo chao cha Afya.

Naye Mkurugenzi wa Halmashauri ya Wilaya ya Mbarali, Kivuma H. Msangi aliongeza kuwa Wilaya ya Mbarali imekuwa na bahati kuweza kupata pesa za mwanzo katika awamu ya pili, tunatakiwa kuidhihirishia Serikali kuwa kweli kulikuwa na uhitaji wa fedha hizo kwa kuhakikisha tunapata Kamati za watu waaminifu na kuhakikisha fedha hizo hazitumiki kwa Matumizi yasiyokusudiwa kama posho wala usafiri.

Msangi aliongeza kuwa kama nguvu za wananchi zitatumika vizuri, Fedha hizo zitatosha kuweza kujenga na kukarabati Majengo yote kwani fedha tulizonazo ni shilingi Milioni Mia Nne (400,000,000/=) na ili kufanikisha shughuli zote   tunatakiwa kuwa na kiasi cha shilingi milioni mia tano na  hamsini na tano, mia moja na tisa elfu mia nane kumi na mbili (555,109,812/=).

Wananchi wa Kata ya Utengule Usangu wameishukuru Serikali kwa kuweza kupeleka Mradi huo kataka kata yao, na wameahidi kutoa ushilikiano katika kila jambo ili kuwenza kufanikisha uboreshwaji wa Kituo cha Afya cha Utengule Usangu.