Milioni 990 zatumika kununua nyumba 20 za Halmashauri kutoka NHC.

Tarehe ya Kuanza: July 24th, 2020

Halmashauri ya Wilaya ya Mbarali mkoani Mbeya imenunua nyumba 20 zenye thamani ya shilingi milioni 990 kutoka Shirika la Nyumba la Taifa (NHC) zilizopo kata ya Lugelele eneo la Igawa kwa ajili ya matumizi ya watumishi wake.

Akiongea katika makabidhiano ya nyumba hizo siku ya tarehe 23/07/2020, Mkuu wa Wilaya ya Mbarali Mhe. Reuben Mfune ameipongea Halmashauri kwa kuwajali watumishi wake kwani kununua nyumba hizo kutaleta unafuu wa makazi kwa watumishi na zitawasaidia kutimiza majukumu yao ya kila siku.

“Nimekuja leo kushuhudia makabidhiano ya nyumba 20 ambazo zimeghalimu shilingi  milioni 990. Ni jambo zuri sana, niwapongeze Halmashauri kwa kuingia makubaliano na NHC kulipia nyumba hizi kwa awamu ndani ya miaka 6. Naagiza ndani ya wiki moja watumishi wote wanaostahili kuingia kwenye nyumba hizi wahamie haraka ili waanze kutoa huduma ya karibu kwa Hospitali ya Wilaya.”

“Kipaumbele cha kwanza katika ugawaji wa nyumba hizi kiwe kwa watumishi wa Idara ya Afya wanaotoa huduma katika hospitali yetu mpya ya Wilaya  kwani hospitali hiyo ipo kilometa 1.5 kutoka hapa na zitakazobaki wapatiwe watumishi wa Idara nyingine za Halmashauri.” Alisema Mhe. Mfune  

Mhe. Mfune ameahidi kuongea na wahusika akiwemo Meneja wa LATRA Mkoa wa Mbeya pamoja na Meneja wa TARURA Wilaya ya Mbarali  ili kuratibu na kutengeneza barabara itakayowafikisha wananchi  hospitali kwa  urahisi kupata Huduma za Afya.

Akiongea kwa niaba ya Mkurugenzi Mtendaji, Afisa Mipango wa Halmashauri ya Wilaya ya Mbarali Ndg. Emmanuel Kishimbo alisema kuwa Halmashauri imenunua nyumba hizo kwa kiasi cha shilingi milioni 990 na hadi kufikia sasa wameweza kulipa shilingi milioni 100 na wamepanga kulipa million 50 ambazo zimetokana na kuzidi kwa makisio ya  makusanyo ya ndani kwa mwaka wa fedha 2019/2020 vilevile kwa mwaka huu wa fedha 2020/2021 Halmashauri imetenga kiasi cha shilingi milioni 150 ili kuendelea kulipa deni.

Ndg. Kishimbo ameishukuru NHC kwa kuiwezesha Halmashauri kujenga nyumba hizo 20 ambazo zipo jirani na ilipojengwa Hospitali mpya ya Wilaya ambayo kwa sasa imeanza kutoa huduma za Utawala, huduma za uzazi wa mpango, huduma za waviu kwa wajawazito, huduma za ustawi wa jamii, huduma za lishe pamoja na huduma ya uhifadhi wa dawa.

Naye Meneja wa Shirika la Nyumba la Taifa Mkoa wa Mbeya Ndg. Said Bungala amesema kwamba wamejenga nyumba hizo ikiwa kutekeleza wajibu wao ili kuhakikisha wananchi wanapata nyumba za makazi na biashara na katika eneo la igawa wamefanikiwa kujenga nyumba 20 ambapo nyumba moja imeghalimu shilingi milioni 49.5.

Aliongeza kuwa Nyumba walizozikabidhi kwa ni kwa ajili ya makazi ya watumishi wa Halmashauri ya Wilaya ya Mbarali na zilianza kujengwa tangu 2015 na hadi kufikia sasa zimekamilika na zipo tayari kwa ajili ya matumizi.

Halmashauri imetenga nyumba 12 kwa ajili ya matumizi ya watumishi wa idara ya Afya na nyumba 8 zinazobaki zitagawanywa kwa watumishi wa idara nyingine.

MWISHO