Miti 200 yapandwa Kituo cha Afya Kapunga kudhibiti ukame.

Tarehe ya Kuanza: April 2nd, 2020

Katibu Tawala wilaya ya Mbarali ndg. Michael Semindu, ameongoza zoezi la upandaji miti 200 ya aina mbalimbali katika Kituo cha Afya cha Kapunga kilichopo Kijiji cha kapunga kata ya Itamboleo siku ya tarehe 01/04/2020 kwenye maadhimisho ya kilele cha upandaji miti kiwilaya kwa lengo la kuboresha mazingira yanayo zunguka kituo cha Afya sambamba na kudhibiti ukame.

Akiongea katika zoezi hilo Ndg. Semindu amewataka wakazi wote wa Wilaya ya Mbarali kuhakikisha wanapanda miti katika maeneo ya wazi pia katika makazi yao kwani kufanya hivyo kutaifanya wilaya kuondokana na hali ya ujangwa na kuifanya Mbarali kuwa ya kijani.

“Taasisi zote za Serikali na zisizo za Serikali zilizopo Wilaya ya Mbarali hakikisheni mnapanda miti katika ofisi zenu, najua wote tunafahamu faida ya kuotesha miti katika mazingira yetu vilevile naendelea kusisitiza tuendelee kuchukua tahadhari ya ugonjwa wa Corona kwa kufuata maelekezo yote yanayotolewa na Viongozi Wakuu wa Nchi pamoja na Wizara ya Afya”. Alisema.

Naye Mkurugenzi Mtendaji wa Halmashauri ya Wilaya ya Mbarali Ndg. Kivuma Msangi, amewataka wananchi wote Wilaya ya Mbarali kuendelea kupanda miti kwa wingi kwenye makazi yao ili iweze kuwatunza kwani siku zote Miti ina faida nyingi ikiwemo kutunza vyanzo vya maji, kudhibiti hali ya hewa, kivuli, matunda na faida zingine.

Katika zoezi hilo elimu dhidi ya tahadhari na hatari ya ugonjwa wa Corona (COVID 19) ilitolewa kwa viongozi na wananchi waliohudhuria na kuwaomba kuwa mabalozi wa kutoa elimu hiyo katika maeneo yao ili waweze kujikinga na kuwakinga wengine.

Kwa ajili ya kuendelea kuchuka tahadhari ya ugongwa wa Corona bila kuathili shughuli zingine, zoezi hilo lilihudhuriwa na watu wachache wakiwemo, wajumbe wa Kamati ya Usalama Wilaya, wataalamu kutoka ofisi ya Mkurugenzi Mtendaji wa Halmashuri ya wilaya ya Mbarali, Wazee Maarufu, Viongozi wa Chama Cha Mapinduzi (CCM) ngazi ya kata pamoja na baadhi ya viongozi wa kata na vijiji
MWISHO