M/KITI UV-CCM TAIFA AIPONGEZA MBARALI KWA KUWAWEZESHA VIJANA.

Tarehe ya Kuanza: December 6th, 2018

Mwenyekiti wa Umoja wa Vijana wa Chama Cha Mapinduzi Taifa (UV-CCM) Comred Kheri D. James ameipongeza Halmashauri ya Wilaya ya Mbarali kwa kuwawezesha vijana wenye umri chini ya miaka 35 kupata mikopo isiyo na riba ili waweze kujikwamua kiuchumi.

Comred Kheri ametoa pongezi hizo alipokuwa kwenye ziara yake katika Wilaya ya Mbarali siku ya tarehe 05/12/2018 kwa lengo la kukagua uhai wa Jumuiya za Vijana, Utendaji wa Chama Cha Mapinduzi Wilaya ya Mbarali,  utekelezaji wa Ilani ya Chama Cha Mapinduzi hususani katika masuala yanayowahusu vijana, kuangalia mahusiano ya Chama na Serikali pamoja na kuangalia uhai wa Chama Cha Mapinduzi.

Akikagua miradi Comred Kheri alisema kuwa Serikali ilichelewa kuanza kutumia mfumo wa force account kwani mfumo huo umeweza kupunguza gharama zisizo na ulazima katika kukamilisha miradi ya Serikali.

Naye Mkuu wa Wilaya ya Mbarali Mhe. Reuben Mfune alisema kuwa, jumla ya kiasi cha tsh milioni 526 zimetolewa kwa ajili ya kuviwezesha vikundi vya Wanawake, Vijana na Walemavu kwa mwaka wa fedha 2016/17 na 2017/18.

Mhe. Mfune aliongeza kuwa kwa mwaka wa fedha 2016/2017 halmashauri ilifanikiwa kufikia lengo la asilimia  100 kwa kutoa fedha zote zilizopangwa kwa ajili ya kuviwezesha vikundi vya wanawake na vijana, kwa mwaka wa fedha 2017/2018 halmashauri ilifanikiwa kutoa asilimia 95, na kwa mwaka wa fedha 2018/2019 halmashauri inaendelea kutoka mikopo ikiwa na lengo la kufikia asilimia 100 ambayo ni  asilimia 10 ya mapato ya ndani.

Mwenyekiti wa UV-CCM Taifa alitembelea mabweni ya Shule ya Sekondari Rujewa, viwanda vya kukoboa mpunga vilivyopo Kata ya Ubaruku, viwanda vilivyopo katika eneo la mwekezaji  Mbarali Estates pamoja na kuhani msiba wa Katibu wa Hamasa wa Umoja wa Vijana Wilaya.

Vilevile mwenyekiti aliweza kufanya mkutano na mabaraza ya jumuia zote za  Chama Cha Mapinduzi Wilaya na baadae alifanya kikao na viongozi wote wa Serikali na Chama ngazi ya Wilaya.

MWISHO