Mkurugenzi Awashukuru Wafugaji kwa Kujitokeza Kwenye Zoezi la Upigaji Chapa wa Mifugo

Tarehe ya Kuanza: November 22nd, 2017

Mkurugenzi Mtendaji wa Halmashauri ya Wilaya ya Mbarali Ndg Kivuma H. Msangi, amewashukuru wafugaji wote wa Wilaya ya Mbarali kupitia kwa viongozi wao  kwa kutoa ushirikiano kwa Maafisa Mifugo na Watendaji ngazi ya Kijiji na Kata kwenye zoezi la upigaji chapa ng’ombe kwa kujitokeza kwa wingi kwenye  zoezi hilo kitu ambacho kimesaidia kuharakisha na kurahisisha zoezi hilo kwenda vizuri.

Akizungumza na wafugaji hao siku ya tarehe 21/11/2017 alipotembelea kujionea namna zoezi hilo linanavyoendele, Msangi amewaomba wafugaji kuacha kwenda kunywesha maji mifugo yao katika eneo la Ihefu ambalo lipo chini ya Hifadhi ya Taifa (RUNAPA) kwani wanapokwenda huko wanapewa adhabu ya kulipa fedha nyingi, na ni bora fedha hizo wakazichanga na zikatumika kuchimba kisima kikubwa ambacho kitatoa maji ya kutosheleza kunywesha mifugo yao.

Mkurugezi aliongeza kuwa, kwa wale ambao hawataleta mifugo yao kupigwa chapa watakuwa wanakiuka agizo la Serikali, na hao wote watachukuliwa kama wavamizi na watachukuliwa hatua za kisheria kwa  mujibu wa sheria.

Msangi aliongeza ya kuwa, zoezi hili lina faida nyingi ikiwemo kujua idadi ya mifugo ili kuweza kupanga matumizi bora ya ardhi kama miundombini ya majosho, maji na mengineyo, kuzua wizi wa Ng’ombe kwani akiwa na chapa ya Mbarali akipatikana Wilaya zingine itasaidia kujua alikoibiwa, itasaidia kuondoa hamahama ya mifugo inayotokea kila siku, kuzuia magonjwa kuhama kutoka sehemu moja kwenda sehemu nyingine, kuondoa migogoro kati ya Vijiji, Wilaya, Mikao na Nchi.

Zoezi la kupiga chapa Mifugo kwa sasa linaendelea kwa Nchi nzima, tarehe ya mwisho ya zoezi hili kitaifa  ni tarehe 31/12/2017, ila kwa upande wa Mkoa wa Mbeya tarehe 30/11/2017.