Mkuu wa Wilaya Awataka Wananchi Kupanda Mikorosho ili Kujiongezea Kipato

Tarehe ya Kuanza: February 8th, 2018

Mkuu wa Wilaya ya Mbarali Mh. Reuben Mfune amewataka wananchi wa Wilayani Mbarali kupanda miche ya zao la Korosho kwenye mashamba makubwa pamoja na majumbani ili kujiongezea kipato pamoja na kuboresha afya.

Ameyasema hayo siku ya uzinduzi wa upandaji wa miche ya zao la Korosho Kiwilaya liliyofanyika katika Kata ya Mawindi Kijiji cha Manienga siku ya jumanne ya tarehe 06/02/2018

Mh. Mfune alisema kuwa, Watafiti kutoka kituo cha Utafiti wa Kilimo Naliendele waliona hali ya hewa ya Wilaya ya Mbarali inafaa kwa upandaji wa zao la Korosho na waliahidi kushirikiana na wananchi wa Wilaya ya Mbarali kuanzisha kilimo cha zao la hilo na kuleta vilaba pamoja na vifaa kwa ajili ya kuotesha miche 21,000 na hadi sasa Wilaya imefanikiwa kuotesha miche ya Korosho 17,000 ambayo ni sawa na asilimia 81.

“Katika Wilaya yetu kila mtu anafikilia sehemu ambazo maji yanaingia kwa ajili ya kuotesha mpunga, katika maeneo ambayo hatuwezi kuotesha mpunga ndio sehemu sahihi ambayo tunaweza kuotesha korosho, kwa mwaka huu tunategemea kuotesha miche kwenye hekta 240. Nawasihi wananchi wa Wilaya ya Mbarali, tusitegemee zao la punga peke yake, tuwe za zao la biashara la mpunga lakini pia tuwe na zao korosho,” alisema

Mh. Mkuu wa Wilaya aliongeza kuwa Kilimo cha Korosho kina faida nyingi zikiwemo, kutupatia Korosho ambazo kwa sasa kilo moja inauzwa tsh. 4,000, inatunza vizuri moyo, ina madini ambayo yanaimarisha mifupa, kupunguza uzito, inatupatia matunda aina ya mabibo ambayo yanaweza kuliwa kawaida au kutengenezea kinywaji aina ya mvinyo au wine, kuongeza kipato, kutupatia mti wa kivuli, na ni rahisi kuutunza.

Naye Afisa kilimo wa Halmashauri ya Wilaya ya Mbarali Ndg. Dickson Kamwela kwa niaba ya Mkurugenzi Mtendaji aliongeza kuwa, Wilaya ya Mbarali katika msimu wa kilimo 2017/2018 imekusudia kuanzisha kilimo cha zao la korosho ili kuboresha maisha ya wananchi kwa lengo la kujiongezea kipato. Kilimo cha korosho kinaendeshwa kwa kushirikiana na Kituo cha Utafiti wa Kilimo Naliendele Mtwara na Bodi ya korosho Tanzania.

“Katika msimu huu wa kilimo, Wilaya kwa kushirikiana na watafiti wa kilimo Naliendele na Bodi ya korosho imeanzisha vitalu vya korosho katika kata za Madibira, Rujewa, Mapogoro na Chimala vyenye jumla ya miche 17,019, vitalu hivyo vinasimamiwa na kutunzwa na vikundi/taasisi na watu binafsi.” Alisema

Baadhi Wananchi wa Kata ya Mawindi waliohudhuria uzinduzi huo, walimpongeza Mh. Mkuu wa Wilaya na Wataalam wake kwa jitihada walizozichukua kuhakikisha kilimo cha Korosho kinafanikiwa wilayani Mbarali, kwani kuna sehemu nyingi wilayani hapa zao la mpunga halikubali, ujio wa zao la korosho litakuwa mkombozi mkubwa kwao kwani litaongeza kipato cha mtu mmoja mmoja.

Zao la Korosho linachukua miaka minne kukua na kuvuna mvuno wa kwanza. Tafiti zinaonyesha kuwa mvuno wa kwana unatoa kilo 0.5 na utakapotimiza miaka 10 unaweza kutoa kilo 25 kwa mti mmoja.

Ekali moja ya zao la korosho linaweza kupandwa miche 69 ambayo kwa muda wa miaka 10 inauwezo wa kuzaa kilo 1,725 ambayo kwa bei ya sasa ya sokoni inaweza kumuingiza mkulima kiasi cha tsh 6,900,000.

Zao la korosho halizuii kupanda Mazao mengine madogo magodo kama mikunde, mahindi na karanga kipindi mti unaendelea kukua