Nafurahishwa na Utendaji Kazi wa Kaimu Mhandisi wa Idara ya Ujenzi – Msangi

Tarehe ya Kuanza: May 29th, 2018

Mkurugenzi Mtendaji wa Halmashauri ya Wilaya ya Mbarali Ndg. Kivuma H. Msangi amempongeza Kaimu Mhandisi wa Idara ya Ujenzi Mr. Enock Francis Mtende kwa kufanya kazi kwa bidii na uzalendo mkubwa katika kipindi kifupi ambacho amekaimu nafasi hiyo.

Msangi ametoa pongezi hizo kwenye Kikao cha Timu ya Wataalam cha tarehe 28/05/2018 ambacho kinafanyika kila siku ya jumatatu ya wiki kwa ajili ya kufuatilia etekelezaji wa kazi za Idara na Vitengo zinazofanywa na Halmashauri.

“Katika kipindi cha Miezi Mitatu Mr. Enock amefanya vitu ambavyo sikutegemea kama ataviweza, ametumia muda wake mwingi nje ya masaa ya kazi kufuatilia kwa karibu Maendeleo ya Miradi ya ujenzi, amenishauri mambo mengi ambayo yameleta mafanikio makubwa kwenye taasisi yetu, huyu ni mfano wa kuigwa” 

Mr. Enock Francis Mtende alianza kukaimu nafasi ya Mhandisi wa Idara ya Ujenzi tarehe 20/02/2018 hadi sasa mara baada ya Kaimu Mkuu wa Idara ya Ujenzi Eng. Abbas Kitalima kupewa jukumu zito la kusimamia uboreshwaji wa Kituo cha Afya Utengule Usangu unakamilika ndani ya muda uliopangwa na Serikali.

Katika kipindi alichoachiwa Ofisi Mr. Enock Mtende ameweza kuishauri Ofisi kutengua baadhi ya mikataba ya ujenzi wa Majengo ambayo yalikuwa hayaendani na kasi ya Serikali ya awamu ya tano na kushauri utumike Mfumo wa Force Account kitu ambacho kilipelekea Majengo hayo kukamilika kwa wakati na ubora zaidi. Majengo hayo ni Wodi ya Wazazi Kituo cha Afya Mawindi, Wodi ya Wazazi Kituo cha Afya Madibira pamoja na Wodi ya Wazazi Kituo cha Afya Utengule Usangu.

Vilevile ameweza kufanya usimamizi wa Majengo mbalimbali kama Bweni la wanafunzi Sekondari ya Madibira, Nyumba ya Watumishi ya Familia Mbili Kijiji cha Nyakazombe kata ya Miyombweni, ujenzi wa Madarasa Shule ya Sekondari Itamboleo na Kapunga zilizopo Kata ya Itamboleo, ujenzi wa maabara Shure ya Sekondari Ipwani iliyopo kata ya Ipwani, ujenzi wa Kituo cha Afya Kapunga, ujenzi wa madarasa  matatu Shule ya Msingi Isisi iliyopo Kata ya Rujewa, ujenzi wa madarasa matatu na vyoo Shule ya msingi Ibohora Kata ya Ubaruku, ujenzi wa madarasa na Ofisi Sekondari ya Mwakaganga iliyopo Kata ya Ubaruku.

Usimamizi wa ujenzi wa vyumba vitatu na Ofisi katika Sekondari ya Igava kwa kushirikiana na RUNAPA, Usimamizi wa ujenzi wa bwalo la Chakula Mawindi Sekondari kwa kushirikiana na RUNAPA.

Usimamizi wa ujenzi wa zahanati kwa kila Kijiji katika Wilaya ya Mbarali pamoja na kutoa elimu kwa wananchi kuhusiana na ujenzi ulio bora sambamba na utoaji wa Vibali vya ujenzi.