Ndani ya Siku 14 Madeni Yote ya Tuzo za Wafanyakazi Hodari Yawe Yameshalipwa – Makalla

Tarehe ya Kuanza: May 1st, 2018

Mkuu wa Mkoa wa Mbeya Mhe. Amos Makalla, ametoa muda wa siku 14 kwa waajiri wote waliopo Mkoa wa Mbeya kulipa malimbikizo ya madeni ya tuzo za zawadi za wafanyakazi hodari zilizokwisha tolewa kwa miaka iliyopita.

Ameyasema hayo kwenye maadhimisho ya siku ya wafanyakazi tarehe 01/05/2018 (Mei Mosi) katika Viwanja vya Sokoine alipokuwa akiwahutubia wafanyakazi wote wa Mkoa wa Mbeya waliojumuika kwa pamoja kutoka katika Wilaya na Halmashauri zote za Mkoa wa Mbeya.

Mhe Makalla aligungua kuwa kuna baadhi ya tuzo za zawadi  zilizotolewa miaka ya nyuma hazijakabidhiwa kwa walengwa hadi sasa na kuamua kutoa agizo hilo la siku 14.

Katika kuhadhimisha sherehe hiyo ya wafanyakazi Duniani, Mhe Mkuu wa Mkoa amewapongeza Wakuu wa Wilaya kwa kushirikiana kwa karibu na wafanyakazi wote katika maeneo yao na  kupelekea Mkoa wa Mbeya kushika nafasi ya pili kwenye ukusanyaji wa Mapato Kitaifa pamoja na nafasi mbalimbali za Kitaifa hasa katika sekta ya elimu.

“Natambua changamoto zote zinazowakabili wafanyakazi, ila hatujawahi kusikia migomo, nawapongeza sana wafanyakazi, tukae pamoja, tutatue changamoto zinazotukabili wakati Serikali ikishughulikia changamoto zetu.”

Mhe Makalla aliongeza kuwa, Serikali kwa kushirikia na vyama vya wafanyakazi itaendelea kutatua kero za wafanyakazi ili waweze kuwahudumia wananchi kwa kiwango kinachotakiwa ikiwamo kusikiliza na kutatua kero zao kwa kutumia vizuri masaa ya kazi.

Kwa upande wa Mifuko ya Hifadhi za Jamii, Mhe. Mkuu wa Mkoa amewataka Viongozi wote wa mifuko hiyo kulipa mafao ya wafanyakazi kwa wakati na wawashughulikie wale wote wanaowakwamisha.

“Fuatilieni fedha za michango zinazochangshwa kwa waajiri, elimu itolewe kwa waajiri na wafanyakazi ili kila mtu atimize wajibu wake.” Alisema Makalla

Akiongea kwa niaba ya wafanyakazi wote wa Mkoa wa Mbeya ndg Melboth Kapinga katibu wa TUICO Kanda, Alisema kuwa vyama vya wafanyakazi vinapongeza jitihada zinazofanywa na Mkoa katika kutatua kero mbalimbali ila wanatoa rai kwa Serikali kutafutiwa ufumbuzi kuhusu suala la mishahara hasa katika suala la makato.

Kuhusiana na madeni Kapinga alisema kuwa, madeni mengi ya watumishi hayajalipwa kwa wakati na hata walioanza kulipwa wamelipa kwa uchache sana.

KAULI MBIU YA MEI MOSI 2018 NI; “Uunganishaji wa Mifuko ya Hifadhi ya Jamii Ulenge Kuboresha Mafao ya Wafanyakazi”