Nimedhamiria Kutimiza Ndoto za Mhe. Rais.- Mhe. Chalamila

Tarehe ya Kuanza: July 4th, 2019

Hayo yamesemwa na Mkuu wa Mkoa wa Mbeya Mhe. Albert Chalamila alipofanya ziara ya kukagua ujenzi wa Hospitali Mpya ya Wilaya ya Mbarali inayojengwa katika Kata ya Lugelele siku ya tarehe 03/07/2019.

Mhe. Chalamila alisema kuwa amedhamiria kutimiza ndoto ya Rais wa Jamhuri ya Muungano wa Tanzania Mhe. Dkt John Pombe Magufuli ya kukamilisha ujenzi wa Hospitali Mpya ya Wilaya ili wananchi waweze kupata huduma, kwani kukamilika kwa hospitali hii, itakuwa ni ukombozi mkubwa  kwa wananchi wa Wilaya ya Mbalari pamoja na wananchi ambao sio wakazi wa Mkoa wa Mbeya wanaotumia barabara Kuu inayoelekea Mbeya.

“Hospitali ya Mpya ya Wilaya ya Mbarali ilishaanza kujengwa jengo moja la Ghorofa ambalo lilishatumia zaidi ya tsh million 730 ambazo zilitolewa miaka ya nyuma. Zilipokuja fedha nyingine ambazo zimetolewa na Mhe. Rais kiasi cha tsh. bilioni 1.5 kwa ajili ya kujenga majengo 7 ya Hospitali ya Wilaya, tuliamua kutoa zaidi  milioni 260 ili ziweze kukamilisha ujenzi wa jengo ambalo lilisimama kutokana ukosefu wa fedha kwa muda mrefu.”

Naye Mkurugenzi Mtendaji wa Halmashauri ya Wilaya ya Mbarali Ndg. Kivuma H. Msangi alisema kuwa, Halmashauri ya Wilaya ya Mbarali ni mojawapo ya Halmashauri zilizopewa kiasi cha fedha cha ths. bilioni 1.5 kwa ajili ya ujenzi wa hospitali mpya za wilaya kutoka Serikali Kuu, lakini kabla ya hapo kulikuwa na jengo la ghorofa moja ambalo lilikuwa halijamalizika.

“Badala ya kujenga majengo saba, sisi Wilaya ya Mbarali tumejenga majengo tisa ambapo tumeongeza majengo mawili ya ziada, ambayo ni jengo la Mifumo ya Umeme (Power House) na Jengo la Dawa za Chanjo (Vaccine). Majengo yote 9 hadi sasa yapo kwenye hatua nzuri ya umaliziwaji na hadi kufikia tarehe 15/07/2019 tutakuwa tumemaliza ujenzi wa majengo yote kutokana na fedha tulizonao ili wananchi waanze kupata huduma.”

Majengo yanayojengwa ni pamoja na Jengo la Wazazi (Maternity), Jengo la Maabara (Laboratory), Jengo la Mionzi (Radiology), Jengo la Dawa za Chanjo (Vaccine), Jengo la Kuhifadhia Madawa (Pharmacy), Jengo la Kufulia Nguo (Laundry), Jengo la Mifumo ya Umeme (Power House), Jengo la Wagonjwa wa Nje(OPD) pamoja na Jengo la Utawala (Administration).

Mwisho