Nyavu Haramu za kiasi cha Shilingi 2,112,00/= Zakamatwa, Kuteketezwa Mbarali.

Tarehe ya Kuanza: September 13th, 2018

Nyavu haramu aina ya Kokoro na Kumbakumba zimekamatwa sehemu mbalimbali na kuteketezwa siku ya tarehe 12/09/2018 na Wataalam wa Mifugo na Uvuvi wa Halmashauri ya Wilaya Mbarali ikiwa ni kampeni ya kupambana na kukomesha matumizi ya nyavu hizo ambazo zimekatazwa kutumika katika shughuli za uvuvi.

Akizungumza katika tukio la utekeketezaji wa nyavu, Afisa Mifugo na Uvuvi wa Halmashauri ya Wilaya ya Mbarali Ndg. Augustino Lawi alibainisha kuwa nyavu hizo aina ya Kokoro na Kumbakumba zilikamatwa siku ya tarehe 11/08/2018 katika maendeo mbalimbali yakiwamo Mto Chimala, Ruaha Mdogo pamoja na katika mifereje ya shamba la Mwekezaji wa Kapunga Estate ambako zilikutwa zimetelekezwa baada ya wahusika kutoweka.

"Kwa mujibu wa Sheria ya Uvuvi Na.22 ya mwaka 2003 kifungu cha 66, nyavu hizi aina ya Kokoro na Kumbakuba zimezuiliwa kutumika kuvua samaki kwenye mito na vyanzo mbalimbali za asili"

Jumla ya Nyavu 8 aina ya Kokoro na Kumbakumba zimekamatwa na kuteketezwa kwa mujibu wa sheria na zoezi hili la kukamata nyavu haramu na kuwachukulia hatua za sheria wahusika ni endelevu.

Daudi Nyingo

Afisa Habari

Halmashauri ya Wilaya ya Mbarali

Mbeya

13/09/2018