SERIKALI YATOA CHAKULA KWA WAATHIRIKA WA MAAFURIKO MBARALI

Tarehe ya Kuanza: January 1st, 2020

Mkuu wa Wilaya ya Mbarali Mhe Reuben Mfune amegawa msaada wa vyakula vyenye thamani ya shilingi million 5.1 kwa wakazi 208 wa kata ya Igava kijiji cha Igava ambao wameathirika kwa kiasi kikubwa na mvua zinazoendelea kunyesha wilayani hapa.

Mhe. Mfune ametoa msaada huo wa vyakula siku ya jumatano ya tarehe 01/01/2020 alipokwenda kwa kuwajulia hali pamoja na kutekeleza ahadi aliyoitoa siku ya tarehe 31/01/2019

“Jana niliwaahidi tunakwenda kutafuta chochote, Mkurugenzi wa Halmashauri ya Wilaya ya Mbarali ametoa vyakula vyenye thamani ya shilingi milioni tano na laki moja, najua hakitakidhi mahitaji, ila kitasadia kusukuma siku tukiwa tunaendelea na mipango mingine, nataka wale wenye uhitaji ndio wapewe msaada huu, viongozi wa ngazi ya kata na vijiji simamieni hili, na nawasihi wananchi wote wasirudi kwenye nyumba ambazo zimeharibika.”

“yapo maeneo mengine ambayo pia yameathirika na maaafuriko, tunaendelea kukusanaya taarifa, na tutawafikia pia kadri tutakavyoendelea kupata misaada. Natoa wito kwa wasamalia wema walio ndani na nje ya Mbarali waendelee kutoa misaada kwa watu ambao wamepata shida hii.” alisema Mhe. Mfune

Naye Mratibu wa Maafa Wilaya ya Mbarali, Ndg. Zabron Abel alisema kwamba mvua zilianza kunyesha kwa kasi siku ya jumapili ya tarehe 29/12/2019 na siku ya jumatatu ya tarehe 30/01/2019 wakazi wengi wa kata ya Igava waliathirika kwa sehemu kubwa ambapo jumla ya wakazi 215 walipoteza makazi yao pamoja na vyakula na kulazimika kuhamia kwenye majengo ya shule.

Baadhi ya wananchi wa kata ya Igava ambao makazi yao yameathirika wamemshukuru Mkuu wa Wilaya kwa kuwasaidia chakula kwa wakati kama alivyoahini ambapo chakula hicho kitawasaidi kwa siku kadhaa huku wakiwa wanajipanga kujitafutia chakula na makazi mengine.

Mkuu wa wilaya ya mbarali amekabidhi unga wa sembe kilo 1050, mchele kilo 1050, maharagwe kilo 480, chumvi pakti 208 na mafuta ya kupikia lita 208 ambapo vyakula hivyo vitagawiwa kwa wananchi 208 wa kijiji cha Igava ambao nyumba zao zimeharibika kwa kiasi kikubwa na kwa kila mmoja wao atapata kilo 5 za unga wa sembe, kilo 5 za mchele, kilo 2 za maharagwe, pakti moja ya chumvi pamoja na mafuta lita moja.
MWISHO