TALGWU WAKABIDHI VIFAA VYA MILION 1 KUKABILIANA NA CORONA MBARALI

Tarehe ya Kuanza: May 4th, 2020

Uongozi wa Chama cha Wafanyakazi wa Serikali za Mitaa Tanzania (TALGWU) Wilaya ya Mbarali kwa Kushirikiana na Uongozi wa TALGWU Mkoa wa Mbeya, wamekabidhi vifaa vya kujikinga na ugonjwa wa Corona vyenye thamani ya kiasi cha shilingi 1,000,000 kwa Mkuu wa Wilaya ya Mbarali ikiwa ni mchango wao ili viweze kutumiwa na watumishi wa idara ya afya kujikinga na Corona pindi wanapotoa huduma kwa wangonjwa.

Akipokea vifaa hivyo ofisini kwake siku ya tarehe 04/05/2020, Mkuu wa Wilaya ya Mbarali Mhe. Reuben Mfune ameushukuru uongozi wa TALGWU kwa kuguswa na kuamua kununua vifaa hivyo ikiwa ni moja ya juhudi za kuisaidia Serikali kupambana na COVID 19.

“Tunahitaji wadau kama nyie ili kuweza kusadia juhudi za Serikali katika kupambana na ugonjwa wa Corona. Serikali ina vifaa vingi, ila kutokana na ugonjwa huu havitoshelezi, nawaomba na wadau wengine wajitokeze kuweza kusaidia juhudi hizi.”

“Nawasihi wananchi wa Mbarali kuendelea kufanya kazi kwa bidii kama alivyoagiza Mhe. Rais Magufuli kwa kufuata taratibu zote za kujikinga na ugonjwa wa Corona kwenye maeneo yote ambayo ni hatarishi na yenye mikusanyiko, na kwa wale wanaokwenda kwenye masoko, minada na magulio, muwe mnakwenda mara moja na kurudi.” alisema Mhe. Mfune

Katibu wa TALGWU Mkoa wa Mbeya Ndg. Sunday Nzaligo alisema kuwa fedha zilizotumika kununulia vifaa hivyo ni mchango wa TALGWU Wilaya ya Mbarali na  walipata wazo la kuchangia vifaa hivyo baada ya kuona mahitaji ya vifaa vya kujikinga na Corona yamekuwa ni makubwa.

Mganga Mkuu wa Halmashauri ya Wilaya ya Mbarali Dr. Godfrey Mwakalila ameushukuru uongozi wa TALGWU Wilaya ya Mbarali kwa kutoa vifaa hivyo kwani vitawasaidia kujikinga pindi watakapokuwa wanatoa huduma za afya pamoja na elimu kwa wananchi namna ya kujikinga na ugonjwa wa Corona.

Vivaa vilivyokabidhiwa ni thermo scanner 1, Sanitizer lita 10, Barakoa 150 pamoja na vidonge vya chlorine 500.

MWISHO