Tuleteeni Changamoto Zenu Tuzitatue-Lubandamo

Tarehe ya Kuanza: May 2nd, 2021

Hayo yamesemwa na Mwenyekiti wa Halmashauri ya Wilaya ya Mbarali Mhe. Twalib Lubandamo (Diwani) alipokuwa akiongea na watumishi wa Kata ya Imalilosongwe siku ya wafanyakazi Duniani ambapo kata hiyo iliandaa maadhimisho hayo kwa ajili ya kuwapongeza watumishi wote wa kata.

Akizungumza katika maadhimisho hayo Mhe. Twalib alisema kuwa Ofisi yake inafahamu ya kuwa kuna changamoto nyingi zinawakabili watumishi wa Halmashauri ya Wilaya ya Mbarali, kwa kushirikiana na Mkurugenzi wapo tayari kuzipokea changamoto hizo na kuzitatua.

“Tunajua watumishi wetu mna changamoto nyingi, tunaomba mtuletee hizo changamoto zenu ili zile tunazoweza kuzitatua tuzitatue na zile ambazo zitakuwa nje ya uwezo wetu tutaziwasilisha sehemu husika ili ziweze kutatuliwa.”

Katika hotuba yake. Mhe. Lubandamo aliongeza kuwa yeye kwa kushirikiana na Madiwani wengine wamejipanga kumaliza tatizo la upungufu wa madawati katika shule zote za sekondari.

“Nilipoingia kwenye Halmashauri kama mwenyekiti, mimi na madiwani wenzangu kipaumbele chetu cha kwanza ilikuwa ni kuhakikisha watoto wetu hawakai chini katika shule zetu zote za sekondari, na hadi sasa tumefanikisha upatikanaji wa madawati Zaidi ya 900.”

 “Ni mategemeo yetu kwamba ndani ya miezi 6 ijayo tutakuwa tumemaliza changamoto ya Madawati katika shule zetu.” Mhe. Twalib

Naye Makamu Mwenyekiti wa Halmashauri ya Wilaya ya Mbarali ambaye ni Diwani wa Kata ya Imalilosongwe.  Mhe. Chuki Mbwanjine amewapongeza watumishi wa kata hiyo kwa kufanya kazi kwa bidii na kuwataka kuendelea kufanya kazi ili kuweza kutatua kero za wananchi.

Aliongeza kuwa ameandaa hafla hiyo ili kuwapongeza na kuendelea kukuza mahusiano mazuri yaliyopo kati ya wafanyakazi, wananchi pamoja na viongozi wa kisiasa na ameahidi kuandaa sherehe za kupongezana kwa kipindi chote atakachokuwa madarakani.

Baadhi ya Madiwani waliohudhuria maadhimisho hayo, wamempongeza Diwani wa Kata ya Imalilosongwe kwa kuandaa sherehe kama hiyo kwani inawaongezea wafanyakazi ari ya kufanya kazi kwa bidii sambamba na kuweka mahusiano mazuri kati yao na jamii na wameahidi kufanya hivyo kwenye kata zao.

Sherehe hizo ziliweza kuhudhuriwa na baadhi ya madiwani kutoka kata mbalimbali ambao ni Mhe. Twalib Lubandamo (Mwenyekiti wa Halmashauri) Diwani kutoka kata ya Itamboleo, Mhe. Bahati Salum kutoka Diwani kata ya Ihahi na Mhe. Elia Bange kutoka Diwani kata ya Kongoro Mswisi.

Wengine ni Mhe. Catherine Madenge (Diwani Viti Maalum), Pascalina Ndungulu (Diwani Viti Maalumu), Zamda Mussa (Diwani Viti Maalum) na Veronica Saga (Diwani Viti Maalum)

Katika maadhimisho hayo burudani mbalimbali zilikuwepo zikiwemo, Mpira wa pete kwa wanawake, Mpira wa miguu kwa wanaume, kuvuta Kamba, kukimbia na chupa pamoja na mbio za mita 100.

MWISHO