"Tuna Upungufu wa Vyumba 39 vya Madarasa”

Tarehe ya Kuanza: December 12th, 2017

Hayo yamesemwa na Mkuu wa Wilaya ya Mbarali Mhe. Reuben Mfune siku ya Jumatatu ya tarehe 11/12/2017 alipoitisha kikao cha pamoja kati ya Waheshimiwa Madiwani, Walezi wa Kata pamoja na Watendaji wa Kata ofisini kwake kwa ajili ya kujadili mapokezi ya Vijana wa kidato cha kwanza na namna ya kutatua changamoto ya upungufu wa Vyumba vya  Madarasa 39 na Madawati 2748 yaliyosababishwa na ongezeko la ufaulu wa wanafunzi wa darasa la saba mwaka 2017.

Jumla ya wanafunzi 6,556 walifanya mtihani wa kumaliza elimu ya msingi Darasa la saba, 4,264 wamefaulu mtihani wao, sawa na asilimia 63.5 ya ufaulu kutoka alilimia 53.9 ya mwaka 2016. Kati ya wanafunzi 4,264 waliofauru mtihani, Wanafunzi 2,686 wamechaguliwa kujiunga na elimu ya sekondari ya kidato cha kwanza kwenye shule mbalimbali kwa mwaka 2018.

“Kila mmoja anajua umuhimu wa swala hili katika eneo lake, na kila mmoja amekuwa akijitahidi kwa jinsi anavyoweza kushirikiana na wananchi alionao kuhakikisha swala hili linafika mwisho, kwa hiyo nitoe wito kwamba kila mmoja wetu tunajua kwamba mwezi wa 12 umefika na ni mwezi wa kilimo, ni muda ambao wanafunzi wanatakiwa waende shule mbalimbali, lakini swala letu hili ni muhimu sana, na Wilaya hii haiwategemei watu wengine  zaidi ya sisi tuliomo ndani ya chumba hiki, viongozi woote ndio sisi tuliopo hapa, kila mmoja aone ananafasi kubwa sana ya kuhakikisha swala hili linafanikiwa” alisema Mhe Mfune

Mhe. Mkuu wa Wilaya ameagiza kutumika kwa fedha zilizopo kwenye akaunti za  Vijiji ili kumalizia ujenzi wa madarasa hayo, na  kwa Vijiji ambavyo havina fedha michango iendelee, vile Vijiji vyenye fedha navyo michango iendelee kwa ajili ya kuludishia fedha hizo kwenye akaunti zilikotolewa ili kuendelea na shughuli ambazo wamejipangia. Ameagiza kuwa fedha hizo ili kutoka zisisubili kikao cha Kijiji kiamue au WDC (Kamati ya Maendeleo ya Kata) iamue hayo ni maelekezo yake, na yeye ndie atakayejibu kuhusu hilo. 

Kuhusu mifuko ya saruji 75 iliyotolewa kwa kila Kijiji, kwa Vijiji vyote 102 na Mbunge wa Mbarali Mhe. Haroon Pirmohamed, Mhe Mfune ameagiza mifuko hiyo itumike katika ujenzi wa madarasa. Vilevile ameahidi kuanza kufanya ziara ya kukagua maelekezo aliyoyatoa akiongozana  na Kamati ya Ulinzi na Usalama ya Wilaya kuanzaia siku ya Ijumaa ya 15/12/2017 na kuendelea.

Katibu Tawala wa Wilaya ya Mbarali Ndg. Ezekia Kilemile amemshukuru Mhe. Mkuu wa Wilaya kwa kuitisha kiakao hicho na amewaomba Wah. Madiwani, Walezi wa Kata na Watendaji wa Kata washirikiane kwani kwa sasa tumepandisha ufaulu kwa asilimia 10 na amemshukuru Mhe. Mkuu wa Wilaya kutoa ridhaa ya mifuko ya saruji iliyotolewa na  Mhe. Mbunge kutumika kujenga madarasa hayo na anaamini hadi kufikia tarehe 08/01/2018 tutakuwa tumekamilisha ujenzi.

Mwenyekiti wa Halmashauri ya Wilaya ya Mbarali Mhe. Francis Mtega amemshukuru Mkuu wa Wilaya kwa fursa aliyompa kwani kwa kawaida hotuba ya Mkuu wa Wilaya huwa ni maagizo, maagizo siku zote huwa hayajadiliwi, na ameahidi kwa niaba ya Wah. Madiwani wengine wanakwenda kutekeleza maagizo yote yaliyotolewa.

Mkurugenzi Mtendaji wa Halmashauri ya Mbarali. Ndg. Kivuma H. Msangi amewashukuru Waheshimiwa madiwani wakiongozwa na Mwenyekiti wa Halmashauri kwa kuhudhuria kikao hicho,na  amewataka Watendaji wote wa Kata na uongozi wao kwa ujumla kutoa ushirikia kwa walezi wa Kata, kwani wanamwakilisha Mkuu wa wilaya na Mkurugenzi Mtendaji kwani wanajitoa kusafiri kwa gharama zao kwenda kutatua matatizo katika kata.