Tuzo ya Tanapa ya Uhifadhi wa Mazingira

Tarehe ya Kuanza: November 24th, 2017

Wakazi Wilayani Mbarali wamelipongeza Shirika la Hifadhi za Taifa Tanapa kwa kuanzisha Tuzo ya Tanapa ya Uhifadhi wa Mazingira na hasa katika kipindi hiki ambacho changamoto ya uharibifu wa mazingira imekua ikiongezeka kwa kasi katika maeneo tofauti Nchini.

Zaidi ya watu 200 kutoka katika kata kumi wamepata semina ya uhifadhi wa mazingira Wilayani Mbarali ikiwa ni pamoja na Jumuia za Watumia Maji, Viongozi wa Serikali za Vijiji na Kata, Taasisi kama shule, na wananchi kwa ujumla.

Wakizungumza katika Mikutano ya Hadhara ya uhamasishaji wa ushiriki wa Tuzo ya TANAPA ya Uhifadhi wa  Mazingira iliyomalizika mwanzoni mwa wiki wilayani Mbarali walisema, Tuzo ya Tanapa ya Uhifadhi wa Mazingira imeleta tija katika uhifadhi wa mazingira kwani jamii sasa imeanza kutambua umuhimu wa kushiriki katika  shughuri za uhifadhi wa mazingira kwa maendeleo endelevu

Sanjari na hilo pia wamelalamikia vitendo vya unyanyasaji vinavyofanywa na baadhi ya askari wa wanyamapori ambavyo kwa kiasi kikubwa vimesababisha jamii kuwa na mtazamo hasi dhidi ya shirika la hifadhi za taifa TANAPA.

Juma Mwankani Mwenyekiti wa Chama cha Mapinduzi Kata ya Ihahi amekili kuwa kabla ya semina iliyotolewa na muhifadhi wa Ruaha ndugu Sharifu Abdul walikuwa wakiamini kuwa TANAPA ni adui na haina faida yoyote kwa jamii. Aidha amelitaka Shirika la TANAPA kuendelea kutoa elimu kwa jamii kuhusu sheria mbalimbali za uhifadhi ili kupunguza ujangili na kulinda jamii kutokana na makosa wanayafanya kutokana na kutokujua sheria.

“leo katika hii semina nimejifunza mambo mengi ikiwa ni pamoja utunzaji wa vyanzo vya maji na misitu kwa ajili ya kukabiliana na Mabadiliko ya Tabia Nchi ni somo zuri na niahidi tu kuwa nitafikisha ujumbe kwa wananchi ili tuweze kutekeleza hilo, lakini kubwa ni maelezo mazuri yaliyotolewa na muhifadhi wa TANAPA kuhusiana na shughuri zinazofanywa na Shirika la TANAPA na namna ambavyo wanaweza kusaidia miradi ya maendeleo kwa jamii kama vile Ujenzi wa shule, Visima vya maji, Hospitali na Maabara” alisema Mwankani.

Gerominasi Gisamo Mkuu wa Shule ya Sekondari Igumbilo  alisema Tuzo ya TANAPA ya Uhifadhi wa Mazingira imehamasisha kwa kiasi kikubwa jamii kushiriki katika uhifadhi wa mazingira lakini pia ameshauri waendelee kutoa elimu ya uhifadhi kwa jamii nzima ili kupata wadau wengi wa uhifadhi kwa maendeleo ya Wilaya ya Mbarali na Taifa kwa ujumla.

“katika semina hii nilichojifinza upo umuhimu wa kuwafundisha watoto umuhimu wa mazingira kwani wao ni mabalozi wazuri katika jamii zinazowazunguka lakini pia kwakufanya hivi tunazalisha kizazi kitakachokuwa na ufahamu wa masuala ya mazingira” alisema  Gisamo.

Kelvin Edisoni Luvanda mwanafunzi wa Shule ya Sekondari Mengele alisema Tuzo ya TANAPA ya Uhifadhi wa Mazingira inatoa hamasa kwa jamii kuongeza juhudi katika masuala ya uhifadhi wa mazingira na hasa pale wanapopata tuzo jambo ambalo linasaidia kulinda mazingira ya maeneo yanayowazunguka.

Diwani wa Kata ya Igurusi Bi. Kihwele alisema “maisha ya watu yanategemea mazingira, Tuzo ya TANAPA ya uhifadhi wa Mazingira imeanzishwa wakati sahihi wakati ambao jamii ilikuwa ikihitaji elimu zaidi ya uhifadhi wa mazingira kutokana na kuongeza kwa changamoto ya ukosefu wa mvua za kutosha iliyosababishwa kwa kiasi kikubwa na ukataji hovyo wa miti na uharibifu wa vyanzo vya maji, ifike hatua sasa tuondoe ile dhana ya panda miti kata mti na badala yake iwe panda miti kwenye maeneo yaliyo wazi kwa maendeleo ya vizazi vijavyo”.

Tuzo ya TANAPA ya Uhifadhi wa Mazingira ilianzishwa mwaka wa fedha 2015/2016 lengo kuu ikiwa ni kushirikisha jamii ya nyanda za juu kusini na hasa katika mikoa ya Mbeya, Iringa na Njombe katika masuala ya uhifadhi wa mazingira na wanyama pori ambapo jumla ya Wilaya tano zinashiriki katika tuzo hiyo.Wilaya ya kilolo, Mufindi, Wanging’ombe, Makete na Mbarali.

Tuzo ya TANAPA ya Uhifadhi wa Mazingira ni endelevu na hutolewa katika Sherehe za Siku ya Mazingira Duniani ambazo huanzimishwa tarehe 5 Juni kila mwaka kwa washindi watatu kutoka kila Wilaya. Makundi yanayoshindaniwa ni pamoja na Uhifadhi wa vyanzo vya maji, Uhifadhi wa misitu ya asili na Upandaji miti ya asili, Uhamasishaji, Uhifadhi wa maeneo yaliyoharibiwa na Uhifadhi wa Wanyama Pori.