Wasichana 4,511 Kupatiwa Chanjo Mbarali

Tarehe ya Kuanza: April 25th, 2018

Wilaya ya Mbarali inatarajia kutoa chanjo ya kukinga Saratani ya Mlango wa Kizazi kwa wasichana 4511 wanaotimiza umri wa miaka 14 kwa mwaka 2018,kupitia vituo 49 vya kutolea huduma za afya kwa kutumia Mkoba kwa shule 50 za sekondari pamoja na msingi ambazo zipo mbali na vituo vya kutolea huduma za afya.

hayo yamebainishwa kwenye uzinduzi wa Chanjo ya kinga ya saratani ya mlango wa kizazi kwa wasichana wote waliotimiza umri miaka 14 katika viwanja vya shule ya msingi rujewa siku ya tarehe 24/04/2018.

Akizungumza wakati wa uzinduzi huo, Mkuu wa Wilaya ya Mbarali Mhe. Reuben Mfune alisema kuwa ili kupata kinga kamili wasichana wanatakiwa kupata dozi mbili ambapo kwa dozi ya kwanza itatolewa muda wowote binti anapofikisha umri wa miaka 14 na dozi ya pili itatolewa baada ya miezi sita kupita.

akiwa katika uzinduzi huo, Mhe. Mfune alitoa rai kwa Viongozi wa Serikali, Viongozi wa Kisiasa pamoja na Viongozi Dini, kusaidia kufikisha ujumbe wa uanzishwaji wa chanjo hiyo ya kuzuia Saratani ya Mlango wa Kizazi kwa wazazi na walezi wa mabinti wote waliotimiza miaka 14 waweze kujitokeza kwa wingi katika vituo vya kutolea huduma za afya ili waweze kupata kinga muhimu katika maisha yao.

Aidha Mhe. Mkuu wa Wilaya aliongeza kuwa katika kukabiliana na magonjwa yanayozuilika kwa chanjo kumekuwa na mafanikio makubwa hapa nchini, mfano magonjwa ya Ndui na Pepopunda kwa watoto wachanga yametoweka katika jamii kwa muda mrefu.

Kaimu Mganga Mkuu wa Halmashauri ya Wilaya ya Mbarali, Dkt.Godfrey Mwakalila ameiomba jamii kutopotosha kuhusu chanjo hiyo inayotolewa na badala yake kuhamasisha watoto wote waliotimiza umri wa miaka 14 kufika katika maeneo na vituo vinavyotoa chanjo hiyo kwa manufaa yao ya baadae.

Dkt.Mwakalila aliongeza kuwa jamii inatakiwa itambue zoezi hili muhimu kwa wasichana waliotimiza mikaka 14 kwani kumekuwa na vifo vingi vitokanavyo na uzazi.

Kwa upande wake Diwani wa Kata ya Rujewa, Mhe Mkude Msasi alisema kuwa kumekuwa na tabia kwa baadhi ya wazazi kunapokuwa na matukio muhimu ya kitaifa hujaribu kukwamisha kwa kutowaleta watoto wao ili waweze kupatiwa chanjo.

“Wazazi na walezi wakishaona matukio kama haya makubwa huenda kwa Diwani wa eneo husika au Mwenyekikti ili kumkatalia mtoto kuwa hawezi kumpeleka na kutoa sababu mbali mbali, ndungu wazazi na walezi tuone kuwa tukio hili ni la muhimu sana kwa watoto wetu kwani litasaidia kuepuka vifo” alisema Diwani.