WATAKAOZIDISHA UJAZO KWENYE MALOBA YA MPUNGA (LUMBESA) KUKAMATWA MBARALI.

Tarehe ya Kuanza: May 1st, 2020

Mkuu wa Wilaya ya Mbarali Mhe. Reuben Mfune ameagiza kukamatwa kwa watu wote watakaozidisha ujazo kwenye Maloba ya mpunga kwani kufanya hivyo ni kukiuka sheria za vipimo ambayo faini yake ni kuanzia tsh 100,000 hadi milioni 50  pamoja na sheria ndogo za halmashauri ambayo faini yake ni kuanzia tsh 200,000 hadi milioni 1.

Mhe. Mfune ameyasema hayo siku ya tarehe 30/04/2020 kwenye kikao cha Baraza la Madiwani cha robo ya tatu ya mwaka 2019/2020 kilichofanyika katika ukumbi wa Shule ya Sekondari Rujewa kata ya Rujewa kwa ajili ya kujadili shughuli mbalimbali za maendeleo  zinazoendela katika Halmashauri

“Sasa hivi ni wakati wa mavuno, kuna watu wananjifanya wajanja kwa kutaka kuturudisha nyuma  kwa kuleta Maloba makubwa yenye ujazo wa zaidi ya kilo 100 yenye rangi sawa na Maloba yaliyoruhusiwa, sisi hatuangalii rangi ya mifuko, tutaipima, na kwa wale watakaozidisha uzito wa kilo 100 watapigwa faini na watachukuliwa hatua za kisheria. Nitawasiliana na meneja wa vipimo na naahidi kupamana na nao”

Kuhusina na suala la mapato Mhe Mfune ameagiza kuchukuliwa hatua kwa watu wote wanaorudisha nyuma zoezi la ukusanyaji wa mapato ya halmashauri, na kwa upande wa wazabuni wanaokusanya  mapato na bado hawajawasilisha fedha halmashauri, waziwasirishe haraka, na kwa  wale wanaokaidi kulipa waondolewe kwa mujibu wa sheria.

“huu sio muda wa kubembelezana, wale waliokuwa wanahistoria ya kusumbua katika masuala ya ukusanyaji wa mapato, sioni haja ya kuendelea nao tena, tuna watu wengi wenye uwezo katika wilaya yetu”

Kuhusiana na ugonjwa wa Corona, Mhe. Mfune amewataka madiwani wote kupambana na ugonjwa huo kwa kushirikiana na watendaji wa Serikali ili wananchi waweze kubaki salama kwani  Corona haina siasa na kama watashindwa kuwalinda wapiga kura wao litakuwa ni jambo baya sana.

Mkuu wa Wilaya aliongeza kuwa vita ya kupambana na Corona ni ya kila mtu na amewataka kuendelea kuwasisitiza wananchi kuvaa barakoa, katika mikusanyiko, maeneo ya kuabudu, masoko, minada, magurio, baa, vilabu vya pombe za kienyeji, misiba pamoja na kwenye vyombo vya usafiri  kwani maeneo hayo ni hatarishi.

MWISHO