WATENDAJI KATA NA VIJIJI WAPIGWA MSASA MBARALI.

Tarehe ya Kuanza: February 2nd, 2026

Mkurugenzi Mtendaji wa Halmashauri ya Wilaya ya Mbarali Ndugu Raymond Mweli amefanya Kikao kilichoshirikisha Wakuu wa Idara na vitengo wa Halmashauri ya Wilaya ya Mbarali na Watendaji Kata na Watendaji wa Vijiji vyote vinavyounda Wilaya ya Mbarali 

Kikao hicho kilichofanyika Leo Tarehe 2 Februari kilikuwa na Lengo la kuwaongezea uwezo watendaji hao katika mambo mbalimbali ya kiutendaji katika maeneo yao ya kazi na kubwa zaidi ikiwa ni ukusanyaji wa mapato ya Halmashauri , Swala la Bima ya Afya Kwa Wote ,Usimamizi wa Miradi ya Maendeleo inayotekelezwa ndani ya maeneo yao, Usafi wa Mazingira, Leseni za biashara,Vibali mbalimbali, na usajili wa vikundi kwa ajili ya kupata mikopo ya asilimia 10 ya Mapato ya Halmashauri.

Akizungumza katika Kikao hicho Mkurugenzi Mtendaji wa Halmashauri ya Wilaya ya Mbarali Ndugu Raymond Mweli amewapongeza watendaji hao kwa kazi nzuri wanayozidi kuifanya katika kuhakikisha wanawahudumia wananchi 

"Natambua kazi nzuri mnayoifanya katika kuhakikisha wanawahudumia wananchi wa Halmashauri ya Wilaya ya Mbarali, lakini katika kutekeleza majukumu yenu Kuna vikwazo mbalimbali mnakumbana navyo hivyo Leo mtakutana na Wakuu wa Idara zote hivyo kama Kuna shida yoyote Leo ndo mahala pake pa kusemea na lengo la Kikao hichi ni kutengeneza mfumo shirikishi baina ya watendaji Kata,Watendaji wa Vijiji na Wakuu wa Idara wa Halmashauri ili kuongeza ufanisi katika kutekeleza majukumu yenu"

Aidha Mkurugenzi Mweli ameelekeza watendaji wote wanaofanya vizuri katika ukusanyaji wa Mapato wazawadiwe ili kuwaongezea nguvu katika ukusanyaji wa mapato na waendelee kuongeza ufanisi katika Utekelezaji wa majukumu yao.

Katika Kikao hicho Wakuu wa Idara zote walipata nafasi ya kuongea na Watendaji na kuwajibu Kero na hoja mbalimbali walizokumbana nazo watendaji katika maeneo yao .

Kwa upande wao watendaji hao walimshukuru Mkurugenzi Mweli kwa kuwapa nafasi ya kukutana na Wakuu wa Idara na vitengo na kuwaongezea uwezo utakaowasaidia kuongeza ufanisi katika kutekeleza majukumu yao