DED, DAS MBARALI WATOA WITO MADIWANI UKUSANYAJI WA MAPATO, USIMAMIZI WA MIRADI NA KUZINGATIA SHERIA.

Tarehe ya Kuanza: December 5th, 2025

Kikao cha kwanza cha Baraza la Madiwani kimefanyika leo Desemba 05, 2025 ambapo Mkurugenzi wa Halmashauri ya Wilaya ya Mbarali, Ndugu Raymond Mweli na Katibu Tawala wa Wilaya hiyo, Ndugu Frank Mastara Sichalwe wametoa wito kwa Madiwani kuwa waadilifu katika kutekeleza majukumu yao, kuzingatia ukusanyaji wa mapato na kusimamia utekelezaji wa miradi ya maendeleo.

Mkurugenzi Mweli na Katibu Tawala Sichalwe wametoa wito huo katika Mkutano wa Kwanza wa Baraza la Madiwani Wilaya hiyo ambapo jumla ya Madiwani wateule 27 wameapishwa sambamba na zoezi la Uchaguzi wa Mwenyekiti na Makamu Mwenyekiti limefanyika pamoja na uwasilishwaji wa taarifa ya Mkurugenzi wa Halmashauri kuhusu shughuli za Halmashauri hiyo.

"Sheria inawatambua na mna wajibu wa kuisimamia Halmashauri kiutendaji, kuratibu ukusanyaji mzuri wa mapato kutoka vyanzo mbalimbali na kusimamia utekelezaji wa miradi ya maendeleo", amesema Mkurugenzi Raymond Mweli.

"Kuwa Diwani kwenye kata yako si kwamba wewe una akili au nguvu sana kuliko wengine, mmepata kibali kuwaongoza wengine hivyo ni jukumu lenu kutenda haki kwa wananchi wenu pia ni jukumu lenu kusimamia sheria katika ukusanyaji wa mapato na usimamizi wa miradi ya maendeleo", amesema Katibu Tawala Frank Mastara Sichalwe.

Aidha Katibu Tawala Sichalwe amewaasa Madiwani hao kujiepusha na migogoro na taasisi mbalimbali na Watumishi wa Serikali ambapo kuwepo kwa migogoro ya aina hiyo hukwamisha utendaji na uwajibikaji huku Mkurugenzi Mweli akibainisha kuwa hatofumbia macho kumuwajibisha mtumishi yoyote atakayezembea kutekeleza majukumu yake ipasavyo.

Kikao hicho kimeendesha pia zoezi la uchaguzi wa Mwenyekiti wa Halmashauri ya Wilaya ya Mbarali ambapo Mhe. Twalib Tamimu Lubandamo ameibuka mshindi huku Mhe. Chuki Jeremia Mbwanjine akishinda nafasi ya Makamu Mwenyekiti.