DED MBARALI AFUNGUA MAFUNZO YA SIS KWA WATUMISHI WA KADA YA ELIMU MBARALI.

Tarehe ya Kuanza: January 17th, 2026

Mkurugenzi Mtendaji wa Halmashauri ya Wilaya ya Mbarali, Ndugu Raymond Mweli amefungua mafunzo ya mfumo wa ukusanyaji wa Taarifa za kielimu kwa kwa Maafisa wa Elimu Wilaya, Maafisa Elimu Kata,  Wakuu wa Shule, Walimu wa Takwimu na Wataaluma leo Januari 17, 2026 kwenye ukumbi wa Shule ya Sekondari Rujewa.

Mfumo wa SIS ni mfumo wa kidigitali wenye lengo la kusaidia kuweka taarifa zote za mwanafunzi zitakazowezesha Waalimu kujua ni hatua gani zitumike kwa wanafunzi wanaoanza kwenda kinyume na maadili ya Elimu ambapo mfumo huu unasaidia kutoa taarifa za papo kwa papo za kielimu kwa mwanafunzi pia utaelekeza jinsi ya kuboresha Miundombinu ya kielimu ikiwemo uhitaji wa  majengo ya Madarasa, vyoo au kuajili Waalimu wapya.

Akizungumza wakati wa Ufunguzi wa mafunzo hayo, Mkurugenzi Mtendaji Ndugu Raymond Mweli amewapongeza Waalimu kwa kukubali kuyapokea mabadiliko na kusisitiza umuhimu wa kuyazingatia mafunzo watakayopata ili kuwafundisha na wengine.

"Dunia ya sasa ni ya kidijitali ni lazima kila kitu utakifanya kwenye mfumo hivyo ni lazima tukubali mabadiliko na twende nayo hayo mabadiliko ili tuongeze tija kwenye kazi zetu, pia niwapongeze kwa kazi nzuri mnayoifanya katika kuhakikisha Mbarali inaendelea kuwa Wilaya bora kielimu", amesema Mkurugenzi Mweli huku akiahidi kuendeleza ukaribu na Walimu katika kuboresha Sekta ya Elimu.

Kwa upande wake Deogratius Nyati, Kaimu Afisa Elimu Msingi Wilaya ya Mbarali amesema mfumo huu utapunguza udanganyifu wa Taarifa za kielimu kwa wanafunzi na hata Walimu.

"Kupitia mfumo huu kila siku mkuu wa Shule au Afisa Elimu Kata atapata taarifa za wanafunzi wote na hata Walimu kuanzia mahudhurio yao na Maendeleo yao Kila siku ", amesema Ndugu Nyati.

Mafunzo hayo yaliyoongozwa na Victor Mushi, Mtaalam wa TEHAMA pamoja na Ndugu Nyati, yamehusisha Kata nane ambazo ni Lugelele, Rujewa, Ubaruku, Imalilo songwe, Igava, Ipwani na Mawindi.