DED MBARALI APOKEA VIFAA VYA TEHAMA KWA AJILI YA SHULE ZA MSINGI MBARALI.

Tarehe ya Kuanza: December 12th, 2025

Katika moja ya jitihada za kuboresha Sekta ya elimu, Mkurugenzi Mtendaji wa Halmashauri ya Wilaya ya Mbarali, Ndugu Raymond Mweli amepokea vifaa vya TEHAMA vitakavyotumika kufundishia  kwa Shule za msingi ikiwa ni utekelezaji wa mpango wa Maendeleo ya Elimu kupitia program ya BOOST.

Vifaa hivyo vilivyotolewa na Wizara ya Elimu ni pamoja na kompyuta, kamera na mashine ya kuchapisha ambapo vifaa hivyo vitasaidia wanafunzi zaidi ya elfu sita wa Shule zilizopo Kata za Mahongole, Igurusi na Rujewa.

Akizungumza wakati wa makabidhiano hayo Mkurugenzi Mweli amewataka Waalimu wa Shule za Msingi zitakazonufaika, kutunza vifaa hivyo ili kuwasaidia wanafunzi kuvitumia kwa muda mrefu.

"Ulimwengu wa Karne ya 21 ni ulimwengu wa kidigitali, sisi Halmashauri ya Wilaya ya Mbarali kwa kushirikiana na Serikali Kuu tumejipanga  kuhakikisha vifaa hivi vitatumika kama inavyokusudiwa ili tupate matokeo ya maarifa na ujuzi ambao wanafunzi wetu wataendelea kupata, pia tutahakikisha Shule zote za Halmashauri ya Wilaya ya Mbarali vinawafikia na kupata wakufunzi wa kufundisha matumizi ya vifaa hivi ", amesema Mkurugenzi Mweli.

Kwa upande wake Kaimu Afisa Elimu Msingi Wilaya ya Mbarali, Ndugu Deogratius Nyati amesema vifaa hivyo vitagawanywa kwa Shule tatu kutoka Kata tatu tofauti ili kuweza kunufaisha Shule nyingine zilizopo jirani.

"Mpango wa BOOST ni mpango endelevu, kwa awamu hii vifaa hivi vitapelekwa kwenye Shule ya Msingi Jamuhuri itakayohudumia Shule za Msingi 5 zilizopo Kata ya Mahongole , Shule ya Msingi Igurusi kwa ajili ya Shule 8 za msingi zilizopo Kata ya Igurusi na Shule ya Msingi Rujewa kwa ajili ya Shule 11 za Msingi zilizopo Kata ya Rujewa pale kutakua na madarasa ya TEHAMA kwa ajili ya kujifunza", amesema Ndugu Nyati.