MADIWANI MBARALI WAMEASWA KUZINGATIA MAFUNZO ELEKEZI KATIKA UTEKELEZAJI MAJUKUMU YAO.

Tarehe ya Kuanza: January 21st, 2026

Mafunzo elekezi ya siku 2 kwa Madiwani yaliyoanza jana Januari 20, 2026 yametamatika rasmi Leo januari 21 katika Ukumbi wa Halmashauri ya Wilaya ya Mbarali ambapo lengo la mafunzo hayo ni pamoja na kuwaongezea uwezo na kuwapa ufahamu juu ya Sheria na Taratibu za kiuongozi.

Akizungumza wakati wa Kuhitimisha mafunzo hayo, Kaimu Mkurugenzi Mtendaji wa Halmashauri ya Wilaya ya Mbarali, Bi. Glory Komba amesema mafunzo hayo yawe chachu ya kuleta utawala bora na usimamizi wa Sheria kwa kila Diwani kwenye eneo lake.

"Natumaini mafunzo haya yamewaongezea ujuzi na kuwapa uelewa zaidi juu ya utawala bora na usimamizi wa Sheria, Miradi na kuwasimamia wataalam katika Halmashauri yetu, hivyo niwaombe mkatumie busara zaidi katika kuamua mambo yanayohusu Halmashauri yetu", amesema Kaimu Mkurugenzi Glory Komba.

Kwa upande wake Mhe. Twalib Tamimu Lubandamo ambaye ni Mwenyekiti wa Halmashauri ya Wilaya ya Mbarali amesema mafunzo hayo elekezi yanakwenda kuwasaidia jinsi ya kuendesha Mabaraza ya Halmashauri kwa kipindi cha miaka mitano ijayo ambapo Madiwani hao watakuwa kwenye nafasi zao za kuwawakilisha wananchi. 

"Tunapopata mafunzo sisi kama Madiwani kwa kiasi kikubwa uendeshaji wa vikao utakuwa ni mwepesi sana sababu kila Diwani anakuwa na uelewa juu ya nini cha kufanya, kipekee niwapongeze wawezeshaji wetu kwa kuendesha mafunzo haya yenye lengo la kutupa mwanga juu ya kusimamia shughuli za Halmashauri", amesema Mwenyekiti Lubandamo. 

Katika mafunzo hayo, Madiwani wamepatiwa mafunzo katika maeneo mbalimbali ikiwemo Utawala Bora, Sheria, haki na stahiki, fedha na ardhi.