MILIONI 532 ZA MIKOPO YA HALMASHAURI KUNUFAISHA VIKUNDI 44 WILAYA YA MBARALI.

Tarehe ya Kuanza: December 16th, 2025

Halmashauri ya Wilaya ya Mbarali imetoa Mikopo yenye thamani ya Shilingi Milioni 532 kwa vikundi 44 vya Wanawake, Vijana na Watu wenye mahitaji maalum kama sehemu ya utekelezaji wa Mpango wa Serikali ya Awamu ya Sita inayoongozwa na Rais wa Jamhuri ya Muungano wa Tanzania, Mhe. Dkt. Samia Suluhu Hassan kwa wanachi kujikwamua kiuchumi.

Hundi ya Mikopo hiyo ambayo imetolewa Oktoba 15, 2025 kwa Vikundi 44 ambavyo vinajumuisha wanufaika wa Mikopo ya asilimia 10 inayotolewa na Halmashauri ambapo baadhi yao wamekiri kunufaika na uzalishaji na kuimarika kiuchumi hasa kupitia sekta ya Kilimo.

Kwa upande wake Mkuu wa wilaya ya Mbarali, Mheshimiwa Brigedia Jenerali Maulid Surumbu amewaasa wanufaika hao wa mikopo kutekeleza mikataba yao ikiwemo kuitumia kwa malengo iliyokusudiwa na kuirejesha kwa wakati ili iweze kunufaisha na wahitaji wengine msisitizo ambao uliungwa mkono na na Mkurugenzi wa Halmashauri ya Wilaya ya Mbarali, Ndugu Raymond Michael Mweli pamoja na Bi. Glory Komba ambaye ni Afisa Maendeleo ya Jamii.

“Kama Kikundi kimekopa basi mhakikishe Wajumbe wote wanauelewa Mkataba vizuri ili kuepukana na changamoto za marejesho, nina imani mnayo elimu na uelewa juu ya ukopaji pamoja na uendeshaji wa miradi yenye tija kwenu, Wilaya na kwa Taifa kupitia Mikopo hii”, amesema Mkuu wa Wilaya Brig. Jen. Maulid Surumbu.

“Tupitie utaratibu wa kusimamia Mikopo hii kurejeshwa ndipo wengine watapata nafasi ya kukopa, kujiendeleza na kurejesha, sisi Halmashauri ni hilo ni jukumu letu”, amesema Mkurugenzi Mweli. 

Kwa upande wa baadhi ya wawakilishi walionufaika na mikopo hiyo wameipongeza Serikali kwa kuiwasilisha mikopo hiyo kwa wakati muafaka kuelekea msimu wa kuanza kwa shuguli za kilimo.