DC Akataa Siasa Katika Utekelezaji wa Mambo ya Maendeleo.

Posted on: November 6th, 2018

Mkuu wa Wilaya ya Mbarali Mhe. Reuben Mfune, amewataka viongozi wote katika Wilaya ya Mbarali kuacha masuala ya kisiasa katika utekelezaji wa shughuli za maendeleo kwenye wilaya yake kwani mambo hayo ya kisiasa wawaachie watu wanaohutubia kwenye majukwaani wakati wa kampeni za kuomba kura, yeye anachotaka ni kuona miradi ya maendeleo inatekelezwa.

Mhe. Mfune ameyasema hayo alipokuwa kwenye mwendelezo wa ziara zake katika kata za Igava, Miyombweni pamoja na Madibira siku ya tarehe 05/11/2018 kwa ajili ya kufuatilia maagizo aliyoyatoa kwa viongozi wa kata na vijiji  kuhusiana na ujenzi wa vyumba vya madarasa, Ujenzi wa zahanati, ujenzi wa vyoo, masuala ya lishe pamoja na uandikishaji wa vyeti vya kuzaliwa kwa watoto wenye umri chini ya miaka 5.

Kuhusiana na ujenzi wa vyumba vya madarasa pamoja na zahanati, Mkuu wa Wilaya ameipongeza Kata ya Igava kwa kutekeleza maagizo aliyoyatoa kwa asilimia kubwa kwani wamekamilisha ujenzi wa vyumba vya madarasa pamoja na kufikia hatua nzuri kwenye ujenzi wa zahanati kwa kila kijiji, ila amewataka zoezi hilo la ujenzi wa madarasa liende sambamba na utengenezaji wa madawati.

“Naridhika na Kata ya Igava katika utekelezaji wa maagizo ya Serikali, mnafanya vizuri katika ujenzi wa zahanati na madarasa endeleeni na spidi mliyonayo, tukikamilisha wote tutaunganisha nguvu katika ujenzi wa kituo cha afya”

Katika hatua nyingine, Mhe. Mfune amezipongeza Kata za Miyombeni na Madibira kwenye suala la uhamasishaji kwa wananchi kujenga vyoo, kwani kwa hatua walizofikia, ni kaya chache tu katika kata hizo ambazo hazijakamilisha ujenzi vyoo ukilingazisha na Kata ya Igava ambapo kuna kaya zipatazo 576 ambazo hazina vyoo kabisa.

“Kaya 576 kukosa vyoo ni tatizo kubwa, wote tunajua kwanini tunahamasisha watu kuhusu  ujenzi wa vyoo.  Lazima watu wajenge kwa vyoo kwa nguvu, hatuwezi kubembelezana suala linalogusa afya zetu, kila mtu lazima awe na choo, kilo 10 za simenti (saruji) zinaweza kutengeneza  choo kikasafishika na ukiweka sinki la plastiki aina ya SATTO unapata choo bora. Tuendelee kuhamasisha wananchi”

Aliongeza kuwa kufikia tarehe 01/12/2018 hataki kusikia kuna kaya ambayo haina choo katika Wilaya yake ya Mbarali sababu kwa sasa tunakoelekea kipindi cha masika, na safari hii hataki kusikia tena magonjwa ya milipuko kama kipindupindu na kuhara maana wote ni mashahidi kwa kilichotokea mwaka 2017 watu zaidi ya 800 waliugua ugonjwa kipindupindu na baadhi walipoteza maisha na moja ya sababu kubwa iliyopelekea ugonjwa huo ni kukosa vyoo kwa baadhi ya kaya.

Kuhusiana na Uandikishiji wa Vyeti vya Kuzaliwa pamoja na Masuala ya Lishe, Mhe. Mfune alisema kuwa, mambo haya ni endelevu, ni vyema tukatumia sehemu zetu za kuabudia katika kutoa elimu ya vitu hivi.

“Tutenge walau dk 10 kwa ajli ya kutoa elimu ya lishe na kupata vyeti vya kuzaliwa kwa watoto wenye umri chini ya miaka 5, tuwaelekeze wananchi umuhimu wake Katika kila mkutano wa hadhara wa kijiji kwa kuwa masuala haya ni endelevu.  Kwa sasa vyeti vya kuzaliwa vinatolewa bure kwa wototo wenye umri wa chini ya miaka 5, baada ya hapo watalazimika kuvilipia.  Wenyeviti wa vijiji pamoja na watendaji tengenezeni utaratibu na muwatangazie wananchi mzunguko wa uandikishaji wa vyeti vya kuzaliwa na katika shughuli zenu za kawaida muwe mnapita kwenye kaya zenu na kuuliza kama kuna watoto ambao hawajaandikishwa.”

“Siku 1000 ndio kipindi cha kujenga  ubongo wa mtoto, na hizo siku zinaanzia tangu mimba inapotungwa hadi mtoto anapotimiza miaka 2, na baada ya hapo haitawezekana tena kumrekebisha,  tunakusudia kutunga sheria ndogo ili wale watakaokaidi kuwapeleka watoto wao kupata utambuzi wa lishe wachukuliwe hatua, lengo letu ni kuepuka kuwa na kaya zenye watoto wenye udumavu au lishe duni. Tunataka kujenga taifa la kesho lililoelimika vizuri kupambana na changamoto na kupiga hatua katika maendeleo”

Mkuu wa Wilaya amemaliza ziara katika kata zote 20 kwa ajili ya kuhamasisha wananchi kujenga vyumba vya madarasa, kujenga zahanati kwa kila kijiji, kujenga vyoo, uandikishaji wa vyeti vya kuzaliwa kwa watoto wenye umri chini ya miaka 5 pamoja na masuala ya lishe tangu inapotungwa mimba hadi mtoto anapofukisha umri wa miaka miwili (siku 1,000).

Mkuu wa Wilaya anatarajia kufanya mkutano na waandishi wa habari siku ya alhamisi ya tarehe 08/11/2018 na kutoa maelekezo ya ujumla kuhusiana na ziara alizozifanya.

MWISHO